କୁଚିଣ୍ଡା ଟାଉନ୍‌ରେ ୬ଟି ହାତୀପଲଙ୍କ ଆତଙ୍କ, ବଜାର ଅଞ୍ଚଳରେ ପଶିଲେ ବନ୍ୟ ହାତୀ

ସମ୍ବଲପୁର ଜିଲ୍ଲା କୁଚିଣ୍ଡା ଟାଉନ୍‌ରେ ଗତକାଲି ସନ୍ଧ୍ୟାରୁ ବନ୍ୟ ହାତୀଙ୍କ ଆତଙ୍କ ଦେଖିବାକୁ ମିଳିଛି। ୬ଟି ହାତୀଙ୍କ ଏକ ପଲ ସହରର ବଜାର ଅଞ୍ଚଳରେ ପଶି ଲୋକଙ୍କ ମଧ୍ୟରେ ଭୟ ସଞ୍ଚାର କରିଛନ୍ତି। ହାତୀପଲ ରାସ୍ତା ଉପରେ ବୁଲିବା ସହ ବିଭିନ୍ନ ଦୋକାନ ଓ ଘର ଭଙ୍ଗାରୁଜା କରିଥିବା ସୂଚନା ମିଳିଛି।

ସନ୍ଧ୍ୟା ସମୟରେ ହାତୀପଲ କୁଚିଣ୍ଡା ଟାଉନ୍‌ର ମୁଖ୍ୟ ରାସ୍ତା ଓ ବଜାର ଅଞ୍ଚଳରେ ପ୍ରବେଶ କରିଥିଲେ। ତାଙ୍କୁ ଦେଖି ଲୋକେ ଭୟରେ ଘର ଭିତରେ ପଶିଯାଇଥିଲେ। ହାତୀମାନେ ରାସ୍ତା ଉପରେ ଥିବା କିଛି ଦୋକାନର କାଉଣ୍ଟର ଓ ଘରର କବାଟ ଭାଙ୍ଗିଥିବା ଦେଖିବାକୁ ମିଳିଛି। ଏହି ଘଟଣା ପରେ ସ୍ଥାନୀୟ ଲୋକେ ଆତଙ୍କିତ ଅବସ୍ଥାରେ ଅଛନ୍ତି।
ପ୍ରାପ୍ତ ସୂଚନାନୁଯାୟୀ, ଏହି ହାତୀପଲ ନିକଟସ୍ଥ ଜଙ୍ଗଲରୁ ଖାଦ୍ୟ ଅନ୍ୱେଷଣରେ ଆସିଥିବା ଅନୁମାନ କରାଯାଉଛି। ବନ ବିଭାଗ ପକ୍ଷରୁ ଘଟଣାସ୍ଥଳରେ ପହଞ୍ଚି ହାତୀମାନଙ୍କୁ ଘଉଡାଇବା ପାଇଁ ଉଦ୍ୟମ କରାଯାଉଛି। ତେବେ ହାତୀମାନେ ରାତିରେ ଟାଉନ୍‌ରେ ରହିଯିବେ କିମ୍ବା ଫେରିଯିବେ ତାହା ସ୍ପଷ୍ଟ ହୋଇନାହିଁ। ଘଟଣାସ୍ଥଳରେ ଉତ୍ତେଜନା ଲାଗି ରହିଛି।