વીરજી ઠુમ્મરનું નિધન: અમરેલીમાં સાંસદ અને કોંગ્રેસના વરિષ્ઠ નેતાની અંતિમયાત્રા

અમરેલીના પૂર્વ સાંસદ અને કોંગ્રેસના વરિષ્ઠ નેતા વીરજી ઠુમ્મરનું ટૂંકી બીમારી બાદ અમરેલીમાં નિધન થયું. તેમના નિધનના સમાચારથી કોંગ્રેસના કાર્યકરો તેમજ રાજકીય અને સામાજિક ક્ષેત્રમાં શોકની લાગણી પ્રસરી છે.

વીરજી ઠુમ્મરે 2004 થી 2009 દરમિયાન અમરેલી લોકસભા બેઠકના સાંસદ તરીકે સેવા આપી હતી. ત્યારબાદ 2017 થી 2022 સુધી લાઠી-બાબરા વિધાનસભા મતવિસ્તારના ધારાસભ્ય તરીકે પણ તેમણે જવાબદારી સંભાળી હતી.

રાજકીય ક્ષેત્ર ઉપરાંત તેમણે વિવિધ સહકારી સંસ્થાઓમાં પણ સેવા આપી હતી, અને કોંગ્રેસના સંગઠન અને સ્થાનિક રાજકારણમાં લાંબા સમયથી સક્રિય રહ્યા હતા.

તેમની અંતિમયાત્રા આજે સાંજે 5 વાગ્યે અમરેલી ખાતે તેમના નિવાસસ્થાનેથી નીકળશે. અમરેલી સહિત સૌરાષ્ટ્રના દિગ્ગજ નેતાઓ અંતિમ યાત્રામાં જોડાઇ શકે છે.