રાજુલામાં સોલાર પેનલના બહાને વેપારી સાથે ૧૯ લાખ રૂપિયાની છેતરપિંડી, પોલીસે છ આરોપીઓ સામે ગુનો નોંધ્યો

રાજુલામાં સોલાર પેનલનો સામાન સપ્લાય કરવાના બહાને એક વેપારી સાથે લાખો રૂપિયાની છેતરપિંડી આચરવામાં આવી હોવાનો કિસ્સો સામે આવ્યો છે. આ મામલે પોલીસે છ આરોપીઓ સામે વિશ્વાસઘાત અને ઠગાઈનો ગુનો નોંધીને કાર્યદેશી કાર્યવાહી હાથ ધરી છે. ફરિયાદનાર ભાવેશભાઈ મંગળભાઈ સિવગણ (ઉંમર ૪૨) એ સ્નેહા, કુલદીપ પટેલ, રવિન્દ્ર પાટીલ, આયુષ ઉપાધ્યાય, મહેશ ઠાકુર અને રાહુલ દિલીપરાવ અંબર (બધા રહે. મુંબઈ) સામે ફરિયાદ નોંધાવી છે.

ફરિયાદ મુજબ, આરોપીઓએ એકબીજા સાથે મેળાપીપણામાં ફરિયાદીનો સંપર્ક કર્યો હતો. તેમણે વિશ્વાસમાં લઈ જણાવ્યું હતું કે તેમની 'સનરૂટ એનર્જી સોલ્યુશન' કંપની પાસેથી સોલાર પેનલનો માલ ખરીદી શકાય. ત્યારબાદ અન્ય આરોપીઓએ પણ સોલાર પેનલ પહોંચાડવાની ખાતરી આપીને ફરિયાદીનો ભરોસો જીત્યો હતો.

સોલાર પેનલના બિલ પેટે તેમની પાસેથી તબક્કાવાર જુદા જુદા બેંક ખાતાઓમાં કુલ રૂ. ૨૪,૨૧,૦૦૦ જમા કરાવી લીધા હતા. નાણાં મેળવી લીધા બાદ માલ મોકલવા અંગે માત્ર વાયદાઓ જ કરવામાં આવ્યા હતા, પરંતુ સોલાર પેનલ મોકલી નહોતી. તેમણે નાણાંની ઉઘરાણી કરતાં આરોપીઓ પૈકી ત્રણેએ રોકડ રૂ. ૫૦,૦૦૦ પરત આપ્યા હતા અને અન્ય એક આરોપીએ ફોન-પે મારફતે રૂ. ૧૧,૦૦૦ ટ્રાન્સફર કર્યા હતા.

આમ, આંશિક રકમ ચૂકવ્યા બાદ પણ બાકી નીકળતા રૂ. ૧૯,૦૦,૦૦૦ ની રકમ પરત ન કરી તેમજ સોલાર પેનલનો માલ પણ ન પહોંચાડી, તમામ છ આરોપીઓએ એકબીજાની મદદગારીથી તેમની સાથે વિશ્વાસઘાત અને છેતરપિંડી આચરી હતી.