સુરતમાં તહેવારોમાં સાયબર છેતરપિંડીથી બચવા જાગૃતિ સેમિનાર યોજાયો

દિવાળી અને આગામી તહેવારોની સિઝનમાં બજારોમાં ધમધમાટ વધવાની સાથે ઓનલાઇન નાણાકીય છેતરપિંડીના જોખમો પણ વધી રહ્યા છે. આ બાબતને ધ્યાને રાખીને વરાછા બેંક અને સુરત જ્વેલરી એસોસિએશનના સંયુક્ત ઉપક્રમે એક વિશેષ ‘સાયબર સિક્યુરિટી અવેરનેસ સેમિનાર’નું આયોજન કરવામાં આવ્યું હતું.

બેંકના ‘સહકાર ભવન’ ખાતે યોજાયેલા આ સેમિનારમાં શહેરના સુરક્ષા તંત્રના ઉચ્ચ અધિકારીઓ ખાસ ઉપસ્થિત રહ્યા હતા. કાર્યક્રમના અધ્યક્ષ સ્થાને સુરત શહેરના ઇન્ચાર્જ પોલીસ કમિશનર વાબાંગ જામીર બિરાજમાન રહ્યા હતા. આ સાથે પોલીસ અધિકારીઓએ ઉપસ્થિત રહી વેપારીઓ અને નાગરિકોને સાયબર ક્રાઈમ સામે સજાગ રહેવા વિસ્તૃત માર્ગદર્શન પૂરું પાડ્યું હતું.