ଶିକ୍ଷକଙ୍କ ବଦଳିକୁ ବିରୋଧ, ସ୍କୁଲରେ ତାଲା ପକାଇଲେ ଛାତ୍ରଛାତ୍ରୀ

ଚାରିଆଡ଼େ ଆଜି ଗାନ୍ଧୀ ଜୟନ୍ତୀ ପାଳନ କରାଯାଉଛି । କିନ୍ତୁ ଆଜିର ଦିନରେ ଛାତ୍ରଛାତ୍ରୀ ଓ ଅଭିଭାବକମାନେ ସ୍କୁଲରେ ତାଲା ପକାଇଛନ୍ତି । ତାଙ୍କର ଦାବି ରହିଛି ଶିକ୍ଷକଙ୍କ ବଦଳିକୁ ପ୍ରତ୍ୟାହାର କରିବା ଓ ଅଧିକ ଶିକ୍ଷକ ନିଯୁକ୍ତି କରିବା । ଘଟଣା ଘଟିଛି କଟକ ଜିଲ୍ଲା ମାହାଙ୍ଗା ବ୍ଲକ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ଗୋଠମୁହଁ ଠାରେ ।ଏହି ବିଦ୍ୟାଳୟରେ ପାଖାପାଖି ୨୦୦ ପିଲା ପାଠ ପଢ଼ନ୍ତି । ତାଙ୍କୁ ପାଠ ପଢ଼ାଇବାକୁ ମାତ୍ର ୫ ଜଣ ଶିକ୍ଷକ ଥିବାବେଳେ ୯ଟି ଶ୍ରେଣୀଗୃହ ରହିଛି । ଏହା ସତ୍ତେ ବିଦ୍ୟାଳୟର ଜଣେ ଶିକ୍ଷକଙ୍କ ବଦଳି ହୋଇଛି । ଫଳରେ ଛାତ୍ରଛାତ୍ରୀ ଓ ଅଭିଭାବକମାନେ ଏହାକୁ ପ୍ରତିବାଦ କରିଛନ୍ତି । ଉକ୍ତ ଶିକ୍ଷକଙ୍କ ଫଳରେ ପିଲାମାନେ ଭଲ ପାଠ ପଢ଼ିବା ସହ ପରୀକ୍ଷାରେ ଭଲ ନମ୍ବର ରଖୁଛନ୍ତି । ତେଣୁ ଅଭିଭାବକମାନେ ବଦଳି ବଦଳରେ ନୂତନ ଶିକ୍ଷକଙ୍କୁ ନିଯୁକ୍ତି ଦେବା ପାଇଁ ଦାବି କରିଛନ୍ତି ।
ଅନ୍ୟପକ୍ଷରେ ଘଟଣାକୁ ନେଇ ବ୍ଲକ ଶିକ୍ଷା ଅଧିକାରିଣୀ ଅବଗତ ଅଛନ୍ତି । ଆଉ ସେ କହିଛନ୍ତି ଯେ, ଏହି ଘଟଣାକୁ ନେଇ ଆବଶ୍ୟକୀୟ କାର୍ଯ୍ୟନୁଷ୍ଠାନ ଗ୍ରହଣ କରାଯିବ ।