લાઠી: ખેડૂતોને સોનાના દાગીનાની લાલચ આપી ૨.૨૦ લાખની ઠગાઈ

લાઠી તાલુકાના હાવતડ ગામમાં રહેતા એક ખેડૂત સાથે સોનાના દાગીનાની લાલચ આપી રૂ. ૨.૨૦ લાખની ઠગાઈ આચરવામાં આવી હોવાની ઘટના સામે આવી છે. આ બનાવ અંગે મધુભાઈ માવજીભાઈ રેંઘોણીયા (ઉ.વ. ૫૨) નામના ખેડૂતે બે અજાણ્યા શખ્સો વિરુદ્ધ લાઠી પોલીસ મથકે ફરિયાદ નોંધાવી છે.

ફરિયાદ મુજબ, આરોપીઓ ખેડૂતના ઘરે આવ્યા હતા અને શરૂઆતમાં વિશ્વાસ સંપાદન કરવા માટે સોનાનું સાચું મોતી આપ્યું હતું. ત્યારબાદ, લાલચ આપી અને વિશ્વાસમાં લીધા બાદ, તેઓએ ખેડૂતને ખોટો સોનાનો દાગીનો પધરાવી દીધો હતો અને બદલામાં રૂ. ૨,૨૦,૦૦૦ રોકડા મેળવી લીધા હતા. આ રીતે ઠગાઈ આચરીને આરોપીઓએ પોતાનો આર્થિક લાભ મેળવ્યો હતો.

પોલીસ દ્વારા નોંધાયેલી ફરિયાદમાં જણાવવામાં આવ્યું છે કે બંને આરોપીઓએ આર્થિક લાભ મેળવવાના સમાન ઈરાદાથી આ ગુનો આચર્યો હતો. આ સમગ્ર બનાવ અંગે લાઠી પોલીસ સ્ટેશનના પી.આઈ. એમ. બી. ચૌધરી વધુ તપાસ કરી રહ્યા છે અને આરોપીઓને ઝડપી પાડવાના પ્રયાસો હાથ ધર્યા છે.