ઝાલોદ બાર એસોસિએશન દ્વારા નવા રેન્ટ એક્ટ-૨૦૨૬નો વિરોધ, ત્રણ દિવસ કોર્ટ કામગીરીથી અળગા રહેશે વકીલો

ઝાલોદમાં ગુજરાત સરકારના નવા રેન્ટ એક્ટ-૨૦૨૬ સામે ઝાલોદ બાર એસોસિએશન દ્વારા વિરોધ નોંધાવવામાં આવ્યો છે. ઝાલોદ બાર એસોસિએશનની એક અર્જન્ટ બેઠકમાં સર્વાનુમતે નિર્ણય લેવાયો છે કે ૧ ઓક્ટોબરથી ૩ ઓક્ટોબર સુધી તમામ એડવોકેટો કોર્ટની કામગીરીથી અળગા રહેશે. આ નિર્ણય નવા કાયદાને લઈને વકીલો તેમજ પ્રજાજનોને પડનારી મુશ્કેલીઓ અને કાયદાકીય પ્રશ્નો અંગે ચર્ચા કર્યા બાદ લેવાયો છે.

બાર એસોસિએશન દ્વારા આ સમયગાળા દરમિયાન વકીલો તથા પક્ષકારોની ગેરહાજરીને કારણે કોર્ટમાં ચાલતા કેસોમાં કોઈને નુકસાન ન થાય તે માટે એકતરફી કાર્યવાહી ન કરવા અને વોરંટ-સમન્સ સહિતની કાર્યવાહી જે તે તબક્કે જ રાખવા એડી. સિનિયર સિવિલ જજ સમક્ષ લેખિત રજૂઆત કરવામાં આવી છે. એસોસિએશનના જણાવ્યા મુજબ, નવા કાયદાના અમલીકરણથી સામાન્ય જનતાને ઘણી મુશ્કેલીઓ પડી શકે છે.

ઝાલોદ બાર એસોસિએશનના પ્રમુખ આર.જી. રાવત, ઉપપ્રમુખ બી.કે. ભૂરીયા અને મંત્રી ડી.કે. નીનામા દ્વારા આ રજૂઆત કરવામાં આવી છે. તેઓએ સરકાર સમક્ષ નવા રેન્ટ એક્ટ-૨૦૨૬માં જરૂરી સુધારા કરવાની માંગ કરી છે. રાજ્યભરમાં વિવિધ બાર એસોસિએશનો દ્વારા પણ આ કાયદાનો વિરોધ કરવામાં આવી રહ્યો છે, અને ઝાલોદ બાર એસોસિએશન પણ આ વિરોધમાં જોડાયું છે.