સાબરકાંઠા: પ્રાંતિજ ચીફ ઓફિસરને અતિક્રમણ હટાવતી વખતે ધમકી, બે શખ્સો સામે ગુનો દાખલ

સાબરકાંઠા જિલ્લાના પ્રાંતિજ શહેરમાં અતિક્રમણ હટાવવાની ઝુંબેશ દરમિયાન અસામાજિક તત્વોનો આતંક સામે આવ્યો છે. પ્રાપ્ત માહિતી અનુસાર, પ્રાંતિજ નગરપાલિકાના ચીફ ઓફિસર હિરેન સોલંકીને બે અજાણ્યા શખ્સો દ્વારા જાહેરમાં બિભસ્ત ગાળો બોલી, ચપ્પુ બતાવી ધમકી આપવામાં આવી હોવાનો ગંભીર આરોપ છે.

આ ઘટના અપ્રોચ રોડ પર ભાંખરિયા વિસ્તારમાં બની હતી, જ્યાં છેલ્લા ૪ દિવસથી દબાણ હટાવવાની ઝુંબેશ ચાલી રહી છે. પોલીસ બંદોબસ્ત વચ્ચે પણ આ બે શખ્સો બેફામ બનીને ચીફ ઓફિસરને ધમકી આપી રહ્યા હતા. આ અંગે ચીફ ઓફિસર હિરેન સોલંકીએ પ્રાંતિજ પોલીસ મથકે ફરિયાદ નોંધાવી છે.

પ્રાંતિજ પોલીસે ચીફ ઓફિસરની ફરિયાદના આધારે સરકારી ફરજમાં અવરોધ ઊભો કરવા બદલ બે શખ્સો સામે ગુનો દાખલ કર્યો છે. પોલીસે આ મામલે વધુ તપાસ હાથ ધરી છે અને આરોપીઓને ઝડપી પાડવાના પ્રયાસો શરૂ કર્યા છે. આ ઘટનાને પગલે શહેરમાં ચકચાર મચી જવા પામી છે.