ધારી નજીક વીજળી પડતા યુવકનું મોત, વાડીમાં મશીન ચલાવતી વખતે બની ઘટના

અમરેલી જિલ્લાના ધારી તાલુકાના બોરડી ગામની સીમમાં ગતરોજ, તા. 30 સપ્ટેમ્બરના રોજ, કમોસમી વરસાદ અને ગાજવીજ સાથે વીજળી પડવાની દુર્ભાગ્યપૂર્ણ ઘટના બની હતી. આ ઘટનામાં એક યુવકનું કરૂણ મોત નીપજ્યું છે.

મળતી માહિતી અનુસાર, બોરડી ગામના 32 વર્ષીય આશિષભાઈ કાનજીભાઈ કુંજડીયા પોતાની વાડીમાં મગફળીનું ઓપનર મશીન ચલાવી રહ્યા હતા. તે દરમિયાન અચાનક વીજળી તેમના પર પડતાં તેઓ ગંભીર રીતે દાઝી ગયા હતા. બનાવની જાણ થતાં જ પરિવારજનો દ્વારા તાત્કાલિક 108 એમ્બ્યુલન્સ બોલાવી તેમને ધારી સરકારી દવાખાને ખસેડવામાં આવ્યા હતા.

જોકે, દવાખાને ફરજ પરના તબીબે આશિષભાઈને મૃત જાહેર કરતાં પરિવારમાં શોક છવાયો હતો. આ ઘટના અંગે ધારી પોલીસે ગુનો નોંધી કાયદેસરની કાર્યવાહી હાથ ધરી છે અને વધુ તપાસ હાથ ધરી છે.