રાજકોટ: પારેવડી ચોક પાસે ગાડી અથડાતા યુવક-યુવતી વચ્ચે છુટા હાથની મારામારી, વીડિયો વાયરલ

રાજકોટ શહેરમાં ટ્રાફિક નિયમોના ભંગ અને જાહેરમાં થતી મારામારીની ઘટનાઓ વધી રહી છે. ત્યારે શહેરના પારેવડી ચોક નજીક એક ચોંકાવનારી ઘટના બની હતી. પ્રાપ્ત માહિતી અનુસાર, બે વાહનો વચ્ચે સામાન્ય અથડામણ થતાં મામલો બિચક્યો હતો અને એક યુવક તથા યુવતી જાહેરમાં એકબીજા સાથે મારામારી કરવા લાગ્યા હતા.

આ ઘટનાના પ્રત્યક્ષદર્શીઓએ જણાવ્યું હતું કે, ગાડી અથડાવાની નજીવી બાબતને લઈને બંને વચ્ચે બોલાચાલી શરૂ થઈ હતી, જે જોતજોતામાં મારામારીમાં પરિણમી હતી. યુવક અને યુવતી એકબીજા પર છુટા હાથ વડે હુમલો કરતા જોવા મળ્યા હતા. આસપાસ લોકોનું ટોળું એકત્ર થઈ ગયું હતું અને તમાશો જોઈ રહ્યું હતું.

આ સમગ્ર ઘટનાનો વીડિયો કોઈએ પોતાના મોબાઈલમાં કેદ કરી લીધો હતો અને તેને સોશિયલ મીડિયા પર પોસ્ટ કર્યો હતો. વીડિયો વાયરલ થતાંની સાથે જ લોકો આશ્ચર્ય અને રોષ વ્યક્ત કરી રહ્યા છે. આવી ઘટનાઓ શહેરમાં કાયદો અને વ્યવસ્થાની સ્થિતિ પર પ્રશ્નાર્થ સર્જી રહી છે.