આમોદના નાહિયેર ગામની સ્વામિનારાયણ વિદ્યામંદિરમાં અજાણ્યા શખ્સ દ્વારા તોડફોડ અને ચોરીનો પ્રયાસ

આમોદ તાલુકાના નાહિયેર ગામે આવેલી શ્રી સ્વામિનારાયણ વિદ્યામંદિરમાં અજાણ્યા ઈસમોએ ઘૂસીને વ્યાપક તોડફોડ કરી હોવાની ઘટના સામે આવી છે. આ ઘટનામાં આચાર્યની ઓફિસમાં રહેલ સી.પી.યુ., મોનિટર, પ્રિન્ટર તેમજ સરકાર દ્વારા આપવામાં આવેલા લેપટોપને નુકસાન પહોંચાડવામાં આવ્યું છે.

પ્રાથમિક માહિતી અનુસાર, બાળકોની આશરે ₹15,000 થી ₹17,000 જેટલી ફીની રકમ પણ ગાયબ હોવાનું સામે આવ્યું છે, જેના પગલે આ ઘટના પાછળ ચોરીનો ઈરાદો હોવાની આશંકા વ્યક્ત કરવામાં આવી રહી છે.

ઘટનાની જાણ થતાં જ આમોદ પોલીસ તાત્કાલિક ઘટનાસ્થળે પહોંચી હતી. પોલીસે શ્વાન દળની મદદથી તપાસ શરૂ કરી છે. હાલમાં CCTV ફૂટેજ અને અન્ય પુરાવાના આધારે અજાણ્યા ઈસમોની શોધખોળ ચાલી રહી છે. પોલીસ આ ઘટના પાછળ માત્ર તોડફોડનો ઈરાદો હતો કે ચોરીનો પ્રયાસ હતો તે દિશામાં તપાસ કરી રહી છે.