રાણપુર સરકારી હોસ્પિટલમાં આયુષ્માન કાર્ડના દુરુપયોગ અંગે વિપક્ષ નેતા દ્વારા ગંભીર આક્ષેપો અને તપાસની માંગ

રાણપુર સરકારી હોસ્પિટલમાં આયુષ્માન કાર્ડના ઉપયોગ અને દર્દીઓને અપાતી સારવારની ગુણવત્તા અંગે તાલુકા પંચાયતના વિપક્ષના નેતા પરવેઝભાઈ કોઠારીઆએ ગંભીર આક્ષેપો કર્યા છે. તેમણે આક્ષેપ કર્યો છે કે કેટલાક દર્દીઓને ટૂંકા સમયની સારવાર બાદ રજા આપી દેવા છતાં હોસ્પિટલના રેકોર્ડમાં તેમને 24 કલાક સારવાર આપવામાં આવી હોવાનું દર્શાવાઈ રહ્યું છે.

આ ઉપરાંત, પરવેઝભાઈ કોઠારીઆએ એવો પણ આક્ષેપ કર્યો છે કે દર્દીઓને રૂ. 300 આપીને તેમનો ફોટો પડાવવામાં આવે છે અને બાદમાં તે રકમ પરત લઈ લેવામાં આવે છે, જે આયુષ્માન કાર્ડ યોજનાના દુરુપયોગ તરફ ઈશારો કરે છે.

આ સમગ્ર મામલે ગંભીરતા દાખવીને પરવેઝભાઈ કોઠારીઆએ હોસ્પિટલના ઇન્ચાર્જ, તાલુકા આરોગ્ય અધિકારી (TDO) અને મામલતદારને લેખિત રજૂઆત કરી છે. તેમણે આયુષ્માન કાર્ડ હેઠળ અપાતી સારવાર, દર્દીઓના દાખલ અને ડિસ્ચાર્જની વિગતોની સંપૂર્ણ તપાસ કરવાની માંગ કરી છે. આ તપાસ બાદ જ સમગ્ર હકીકત સ્પષ્ટ થશે અને જવાબદાર સામે પગલાં લેવાઈ શકશે.