ମାଡ଼ିଆସିଲା ମହାନଦୀ ବନ୍ୟାଜଳ, ବୁଡ଼ିଲା ରାସ୍ତା

ମହାନଦୀରେ ଚତୁର୍ଥ ବନ୍ୟା ଜଳ ପ୍ରବାହିତ ହେଉଥିବାବେଳେ ବାଙ୍କୀର ବିଭିନ୍ନ ଶାଖା ନଦୀରେ ତୃତୀୟ ବନ୍ୟା ଜଳ ପ୍ରବେଶ କରିଛି । ଫଳରେ ବାଙ୍କୀ ଡମପଡ଼ା ବ୍ଲକ୍ ର ଭେଡା ରାମଚନ୍ଦ୍ରପୁର, ତାଳବସ୍ତ, ବିଲିପଡ଼ା, ପାଥପୁର, ଶିମିଳିପୁର, ହରିରାଜ୍ପୁର ପଞ୍ଚାୟତର ହଜାର ହଜାର ହେକ୍ଟର ଜମିରେ ପାଣି ମାଡ଼ି ଚାଲିଛି ।

ବାଙ୍କୀ ବ୍ଲକର ବ୍ରହ୍ମପୁରା, ଅନୁଆରି, ଗ୍ରାମ ପଞ୍ଚାୟତରେ ଜମିରେ ପାଣି ପ୍ରବାହିତ ହେଉଛି । ମହାନଦୀର ଉତ୍ତର ପାର୍ଶ୍ୱରେ ଥିବା ହୁଳୁହୁଳା ପୋଲ ଉପରେ ତିନି ଫୁଟ ପାଣି ପ୍ରବାହିତ ହେଉଥିବାରୁ ବାଙ୍କୀ ବ୍ଲକର ପାଞ୍ଚଟି ପଞ୍ଚାୟତର ଲୋକେ ପ୍ରଭାବିତ ହେଉଛନ୍ତି । ବାଙ୍କୀ ବ୍ଲକ ବାହ୍ୟ ଜଗତରୁ ବିଛିନ୍ନ ହୋଇଛି।
ସେହିଭଳି ଖୋର୍ଦ୍ଧା ବାଙ୍କୀର ବିଲିପଡା ତାଳବସ୍ତ ରାସ୍ତାରେ ତିନି ଫୁଟ ପାଣି ପ୍ରବାହିତ ହେଉଛି । ଫଳରେ ବାଙ୍କୀ ଖୋର୍ଦ୍ଧା ରାସ୍ତାରେ ଗମନା ଗମନ ଠପ୍ ହୋଇଯାଇଛି । ପାଥପୁର ଗ୍ରାମ ପଞ୍ଚାୟତର କଇଁମୁଣ୍ଡି ବାହ୍ୟ ଜଗତରୁ ବିଚ୍ଛିନ୍ନ ହୋଇ ଯାଇଛି । ମୁଖ୍ୟ ରାସ୍ତାକୁ ଯାତାୟତ ଠପ୍ ହୋଇଯାଇଛି।