ବଲାଙ୍ଗିର ବ୍ୟବସାୟୀଙ୍କୁ ଅପହରଣ ମାମଲା; ୨ ଦିନିଆ ରିମାଣ୍ଡରେ ଗଲେ ଘଟଣାର ମୁଖ୍ୟ ଅଭିଯୁକ୍ତ

ପୁଣି ଫେରିଲା ବହୁଚର୍ଚ୍ଚିତ ବଲାଙ୍ଗିର ବ୍ୟବସାୟୀ ଗୁଣ୍ଡା ସାହୁଙ୍କ ଅପହରଣ ମାମଲା । ଘଟଣାର ମୁଖ୍ୟ ଅଭିଯୁକ୍ତ କ୍ଷିତିଶ ଚନ୍ଦ୍ର ସାହୁଙ୍କୁ ରିମାଣ୍ଡରେ ଆଣିଲା ବଲାଙ୍ଗିର ପୁଲିସ । ଦୁଇଦିନିଆ ରିମାଣ୍ଡ ପାଇଁ ମାନ୍ୟବର କୋର୍ଟ ଅନୁମତି ଦେଇଛନ୍ତି । ଆଜି କ୍ଷିତିଶକୁ ଜେଲରୁ ହସ୍ପିଟାଲ ନେଇଥିଲା ବଲାଙ୍ଗିର ପୁଲିସ । ହସ୍ପିଟାଲରୁ ଅଜଣା ଜାଗାକୁ ନେଇ ତାଙ୍କୁ ପଚରା ଉଚୁରା କରୁଛି ବଲାଙ୍ଗିର ପୁଲିସ । ଗତ ୧୫ ତାରିଖ ଦିନ ବଲାଙ୍ଗିରର ଜଣାଶୁଣା ବ୍ୟବସାୟୀ ନରେନ୍ଦ୍ର ସାହୁ ଓରଫ ଗୁଣ୍ଡା ସାହୁଙ୍କୁ ଅପହରଣ କରିଥିଲା କ୍ଷିତୀଶ । ପୁଲିସ ଗୁଣ୍ଡା ସାହୁଙ୍କୁ ଉଦ୍ଧାର କରିବା ସହିତ ଘଟଣାରେ ସବ-ଇନ୍ସପେକ୍ଟର ସ୍ନେହ ମଞ୍ଜରୀ ସାହୁ ଓ କ୍ରାଇମ ରିପୋର୍ଟର ସଞ୍ଜୟ ଜେନାଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ଏବେବି ପାଞ୍ଚରୁ ଛଅ ଅଭିଯୁକ୍ତ ଫେରାର ଅଛନ୍ତି ।
ଘଟଣାର ଅନ୍ୟ ଅଭିଯୁକ୍ତମାନଙ୍କ ବିଷୟରେ ଅଧିକ ତଥ୍ୟ ହାସଲ ପାଇଁ କ୍ଷିତୀଶଙ୍କୁ ଦୁଇଦିନିଆ ରିମାଣ୍ଡରେ ନିଆଯାଇଥିବାର ଅନୁମାନ କରାଯାଉଛି । ଏହା ସହିତ ଅପହରଣରେ ଆଉ କିଏ କିଏ ସାମିଲ ଥିଲେ ତାହା ମଧ୍ୟ ପୁଲିସ ଜାଣିବାକୁ ଚେଷ୍ଟା କରିବ ବୋଲି ସୂଚନା ମିଳିଛି ।