અમદાવાદ: થેલેસેમિયા ગ્રસ્ત બાળકો માટે 'મુસ્કાન માટે રક્તદાન' કેમ્પમાં ૬૩૨ યુનિટ રક્ત એકત્ર

અમદાવાદ શહેર પોલીસ દ્વારા રેડ ક્રોસ સોસાયટીના સહયોગથી થેલેસેમિયા ગ્રસ્ત બાળકોની સહાય અર્થે 'મુસ્કાન માટે રક્તદાન 2026' અંતર્ગત એક વિશાળ મહારક્તદાન કેમ્પનું સફળ આયોજન કરવામાં આવ્યું. આ કેમ્પમાં શહેરના નાગરિકો, પોલીસ જવાનો, હોમગાર્ડ્સ અને મીડિયા મિત્રોએ ઉત્સાહભેર ભાગ લીધો હતો.

ડીસીપી ઝોન 6 અંતર્ગત આવતા નારોલ, દાણીલીમડા, કાગડાપીઠ, ઇસનપુર, મણિનગર પોલીસ સ્ટેશનો તેમજ ACP K-ડિવિઝન અને ACP J-ડિવિઝન દ્વારા સંયુક્ત રીતે એકા ક્લબ (કાંકરિયા, મણિનગર) ખાતે આ રક્તદાન કેમ્પ યોજાયો હતો. આ પહેલનો મુખ્ય ઉદ્દેશ્ય થેલેસેમિયાથી પીડિત બાળકો માટે જરૂરી રક્તનો પુરવઠો સુનિશ્ચિત કરવાનો હતો.

આ માનવતાવાદી કાર્યમાં શહેરજનોના અભૂતપૂર્વ સહયોગથી કુલ ૬૩૨ યુનિટ રક્ત એકત્રિત કરવામાં આવ્યું. આટલી મોટી સંખ્યામાં એકત્ર થયેલ રક્ત થેલેસેમિયા ગ્રસ્ત બાળકોના જીવનમાં નવી આશા અને ખુશી લાવશે તેવી અપેક્ષા રાખવામાં આવી રહી છે.