પાટણ: દુષ્કર્મની ફરિયાદ ન લેવા બદલ સમી પોલીસ હેડ કોન્સ્ટેબલ સામે ગુનો દાખલ

પાટણ જિલ્લાના સમી પોલીસ સ્ટેશનમાં એક ગંભીર મામલો સામે આવ્યો છે. એક ૨૯ વર્ષીય મહિલાએ દુષ્કર્મ અંગે ફરિયાદ નોંધાવવાનો પ્રયાસ કર્યો હતો, પરંતુ પોલીસ દ્વારા ફરિયાદ લેવાને બદલે માત્ર સામાન્ય બોલાચાલીની અરજી લેવાઈ હોવાનો આક્ષેપ કરવામાં આવ્યો છે. આ ઘટના બાદ સમગ્ર પંથકમાં ચકચાર મચી જવા પામી છે.

આ ગંભીર આરોપો બાદ મામલે ઉચ્ચ અધિકારીઓના આદેશથી તાત્કાલિક તપાસ હાથ ધરવામાં આવી હતી. તપાસ દરમિયાન, મહિલા દ્વારા કરવામાં આવેલા આરોપો સાચા જણાઈ આવતા, સંબંધિત હેડ કોન્સ્ટેબલ સામે કાર્યવાહી કરવાની ભલામણ કરવામાં આવી હતી.

તપાસના અંતે, સમી પોલીસ સ્ટેશનના હેડ કોન્સ્ટેબલ કાળુભા બચુજી સામે ભારતીય ન્યાય સંહિતા (BNS) ની કલમ ૧૯૯(c) હેઠળ ગુનો દાખલ કરવામાં આવ્યો છે. આ કાર્યવાહી સમી પોલીસ સ્ટેશનના ઈન્ચાર્જ PI એ.પી. જાડેજાની ફરિયાદના આધારે કરવામાં આવી છે.