ପହଞ୍ଚି ପାରିଲାନି ଆମ୍ୱୁଲାନ୍ସ; ବାତ୍ୟା ଆଶ୍ରୟସ୍ଥଳୀରେ ଜନ୍ମ ନେଲା ଶିଶୁ

ରାଜ୍ୟର ଅନେକ ସ୍ଥାନରେ ଲଗାତାର ବର୍ଷା ଫଳରେ ବନ୍ୟା ପରିସ୍ଥିତି ଉପୁଜିଛି । ଏହାକୁ ଦୃଷ୍ଟିରେ ରଖି ପ୍ରଭାବିତ ଅଞ୍ଚଳର ଲୋକମାନଙ୍କୁ ପ୍ରଶାସନ ବାତ୍ୟା ଆଶ୍ରୟସ୍ଥଳକୁ ସ୍ଥାନାନ୍ତର କରିଥିଲେ । ଏହା ମଧ୍ୟରେ ଏକ ବାତ୍ୟା ଆଶ୍ରୟସ୍ଥଳୀରେ ଜନ୍ମ ନେଇଛି ଶିଶୁ। ଘଟଣା ଘଟିଛି ବାଲେଶ୍ୱର ଛାନୁଆ ପଂଚାୟତ ସାନ ଗୋବରା ଗାଁରେ । ଅବପାତ ପ୍ରଭାବରେ ରାଜ୍ୟର ଅନେକ ସ୍ଥାନରେ ବର୍ଷା ଲାଗିରହିଥିଲା । ଫଳରେ ସାନ ଗୋବରା ଗାଁ ସମ୍ପୂର୍ଣ୍ଣ ଭାବରେ ଜଳବନ୍ଦୀ ହୋଇଯାଇଥିଲା । ଠିକ ସମୟରେ ଆମ୍ୱୁଲାନ୍ସଟି ପହଞ୍ଚି ପାରିନଥିଲା । ଭୋର୍ ସମୟରେ ପିଲାର ମା’ଙ୍କର ଲେବର ପେନ୍ ଆରମ୍ଭ ହୋଇଥିଲା । ଆଉ ସକାଳୁ ବାତ୍ୟା ଆଶ୍ରୟସ୍ଥଳୀରେ ହିଁ କୁନି ଶିଶୁଟି ଜନ୍ମ ନେଇଥିଲା ।
ଓଡ଼୍ରାଫ୍ ଦ୍ଵାରା ଉଭୟ ମା ଓ ଶିଶୁଙ୍କୁ ବାତ୍ୟା ଆଶ୍ରୟସ୍ଥଳୀରୁ ଉଦ୍ଧାର କରି ବାଲେଶ୍ଵର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରଣ କରାଯାଇଛି । ବର୍ତ୍ତମାନ ଉଭୟ ମା ଓ ଶିଶୁ ସୁସ୍ଥ ଥିବାର ଜଣାପଡ଼ିଛି ।