ଘାସ ମରା ବିଷ ଦେଇ ନବବଧୂକୁ ମାରିଦେଲେ !

ନବ ବିବାହିତାଙ୍କୁ ହତ୍ୟା ଅଭିଯୋଗ । ଘାସ ମରା ବିଷ ଦେଇ ହତ୍ୟା କରାଯାଇଥିବାର ଅଭିଯୋଗ ଆଣିଛନ୍ତି ପରିବାର ଲୋକେ । ଘଟଣା ଘଟିଛି ବାଲେଶ୍ଵର ଜିଲ୍ଲା ଶିଳ୍ପାଞ୍ଚଳ ଥାନା ଅନ୍ତର୍ଗତ ଶାସନ ବାଡ ଗାଁରେ ।ପୁରୁଣା ବାଲେଶ୍ଵର ଅଞ୍ଚଳର ଅମ୍ବିକା ସ୍ୱାଇଁଙ୍କର ଦେଢ଼ ବର୍ଷ ପୂର୍ବରୁ ବିବାହ ହୋଇଥିଲା । ବିବାହ ପରେ ପରିବାରରେ ଅଶାନ୍ତି ଲାଗିରହିଥିଲା । ଏପରିକି ଅମ୍ବିକାଙ୍କୁ ଯୌତୁକ ପାଇଁ ଶାଶୁଘର ଲୋକେ ନିର୍ଯାତନା ଦେଉଥିଲେ । ତେଣୁ ଝିଅଙ୍କୁ ଘାସ ମରା ବିଷ ଦେଇ ହତ୍ୟା କରାଯାଇଥିବାର ଅଭିଯୋଗ କରିଛନ୍ତି ମୃତକଙ୍କର ପରିବାର । ବିଷ ପିଇବା ପରେ ପ୍ରଥମେ ତାଙ୍କୁ ବାଲେଶ୍ଵର ଫକୀର ମୋହନ ମେଡିକାଲ କଲେଜକୁ ନିଆଯାଇଥିଲା । ଆଉ ଅବସ୍ଥା ସଙ୍କଟାପୂର୍ଣ୍ଣ ହେବାରୁ ଭୁବନେଶ୍ୱରର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ଯେଉଁଠାରେ ତାଙ୍କର ମୃତ୍ୟୁ ଘଟିଥିଲା ।
ପରିବାରଲୋକଙ୍କ ଅଭିଯୋଗ ପରେ ଅମ୍ବିକାଙ୍କ ସ୍ୱାମୀ ଓମ ପ୍ରକାଶ ସ୍ୱାଇଁଙ୍କୁ ବାଲେଶ୍ଵର ଶିଳ୍ପାଞ୍ଚଳ ଥାନାରେ ଅଟକ ରଖିଛି ପୁଲିସ । ଓମ ପ୍ରକାଶଙ୍କୁ ପଚରାଉଚରା କରିବା ସହ ତଦନ୍ତ କରାଯାଉଥିବା କହିଛନ୍ତି ଶିଳ୍ପାଞ୍ଚଳ ଥାନା ଅଧିକାରୀ ।