અમદાવાદ: જમાલપુર વોર્ડમાં વિકાસ કાર્યોમાં કથિત ટકાવારી માંગવાના મુદ્દે રાજકીય માફિયાગિરીનો આરોપ

અમદાવાદના જમાલપુર-રાયખડ વોર્ડમાં રાજકીય માફિયાગિરી ચાલતી હોવાનો ગંભીર આરોપ સ્થાનિક ભાજપના કાર્યકર અને યુવા નેતા એજાજ શેખ દ્વારા કરવામાં આવ્યો છે. તેમણે વોર્ડના એક મહિલા કાઉન્સિલરના પતિ પર વિકાસ કાર્યો અને કોન્ટ્રાક્ટ સંબંધિત કામોમાં કથિત રીતે ટકાવારી માંગવાનો આક્ષેપ કર્યો છે.

એજાજ શેખે જણાવ્યું છે કે, જમાલપુર વોર્ડમાં ચાલતા વિકાસ કાર્યો અને કોન્ટ્રાક્ટરો પાસેથી કામ આપવાના બદલામાં કથિત રીતે રોયલ્ટી કે ટકાવારી માંગવામાં આવતી હોવાની ગંભીર ફરિયાદો મળી રહી છે. આ પ્રકારની પ્રવૃત્તિઓ ઉત્તર પ્રદેશ અને બિહાર જેવા રાજ્યોમાં જોવા મળતી રાજકીય માફિયાગિરી જેવી હોવાનું તેમણે જણાવ્યું હતું.

આ મુદ્દે એજાજ શેખે તાત્કાલિક અને નિષ્પક્ષ તપાસની માંગ કરી છે. તેમણે જણાવ્યું છે કે, જો આ આરોપો સાચા ઠરશે તો તે ખૂબ જ ગંભીર બાબત છે અને આવા તત્વો સામે કડક કાર્યવાહી થવી જોઈએ. તેમણે પ્રશ્ન કર્યો છે કે શું કોન્ટ્રાક્ટરો પાસેથી ખરેખર રોયલ્ટી લેવામાં આવે છે?