અંબાજી માર્ગ પર 'અંબિકા સેવા કેમ્પ' દ્વારા ૯ વર્ષથી પદયાત્રીઓની અવિરત સેવા..

દાંતા-અંબાજી માર્ગ પર આવેલ હરિવાવ ખાતે 'અંબિકા સેવા કેમ્પ' શ્રદ્ધાળુઓ માટે આસ્થા અને સેવાનો અનોખો સંગમ બની ગયો છે. સાણંદના ગોધાવી ગામના માઇભક્તો દ્વારા છેલ્લા ૯ વર્ષથી આ સેવા યજ્ઞ સતત ૨૪ કલાક અવિરતપણે ચાલી રહ્યો છે..

આ સેવા કેમ્પમાં દરરોજ આશરે ૭૦ થી ૮૦ હજાર જેટલા પદયાત્રીઓ માટે ભોજન, પાણી, ચા-નાસ્તો અને આરામની સુવિધાઓ પૂરી પાડવામાં આવે છે. ભક્તોને 'રજવાડી આતિથ્ય' મળે તે પ્રકારની વ્યવસ્થા ગોઠવવામાં આવે છે,જેથી તેમને ઘર જેવી લાગણી અનુભવાય.કેમ્પના સંચાલક પ્રદીપસિંહ વાઘેલાએ જણાવ્યું હતું કે આ સેવા પાછળનો મુખ્ય ઉદ્દેશ્ય યાત્રાળુઓની સુવિધા અને તેમની શ્રદ્ધાને માન આપવાનો છે.ભક્તોના ચહેરા પર સંતોષ જોઈને અમને આનંદ થાય છે અને આ સેવા કાર્ય ચાલુ રાખવા માટે પ્રેરણા મળે છે.