પંડવાઇ સુગર ફેક્ટરીને શ્રેષ્ઠ નાણાકીય વ્યવસ્થાપન માટે રાષ્ટ્રીય પુરસ્કાર, ભરૂચ જિલ્લાનું ગૌરવ વધ્યું

ભરૂચ જિલ્લાના હાંસોટ તાલુકામાં સ્થિત સહકારી ક્ષેત્રની પ્રતિષ્ઠિત 'પંડવાઇ સુગર ફેક્ટરી' (ધ પંડવાઇ વિબાગ સહકારી ખાંડ ઉદ્યોગ મંડળી લિમિટેડ) એ રાષ્ટ્રીય સ્તરે સિદ્ધિ મેળવી છે. નવી દિલ્હી ખાતે આયોજિત એક ભવ્ય રાષ્ટ્રીય સમારોહમાં ફેક્ટરીને તેના ઉત્કૃષ્ટ અને પારદર્શક નાણાકીય વ્યવસ્થાપન (Financial Management) માટે દેશભરમાં શ્રેષ્ઠ જાહેર કરીને પુરસ્કૃત કરવામાં આવી છે.

આ ફેક્ટરી માટે આ ગૌરવપૂર્ણ બીજો રાષ્ટ્રીય પુરસ્કાર છે. ફેક્ટરીના મજબૂત વહીવટ અને ખેડૂતલક્ષી અભિગમને કારણે આ સિદ્ધિ પ્રાપ્ત થઈ છે. સમગ્ર ગુજરાતના સહકારી માળખા માટે આ એક ઐતિહાસિક ક્ષણ ગણી શકાય.

આ રાષ્ટ્રીય પુરસ્કાર મળતાં જ દક્ષિણ ગુજરાતના શેરડી પકવતા હજારો સભાસદ ખેડૂતો, ફેક્ટરીના ડિરેક્ટરો અને કર્મચારીઓમાં ખુશીનો માહોલ છવાઈ ગયો છે. સૌએ એકબીજાને મીઠાઈ ખવડાવીને અને શુભેચ્છાઓ પાઠવીને આ સિદ્ધિની ઉજવણી કરી હતી.