અમદાવાદ: ઢાલગરવાડમાં દુકાનમાં તોડફોડ કરનાર લુખાઓનો પોલીસે જાહેરમાં વરઘોડો કાઢ્યો, વેપારીઓમાં ખુશી

અમદાવાદના ઢાલગરવાડ વિસ્તારમાં 7 થી 8 લુખા તત્વોએ એક દુકાનમાં ઘૂસી તોડફોડ કરતાં ચકચાર મચી હતી. પોલીસે તાત્કાલિક કાર્યવાહી કરી આરોપીઓને પકડી પાડ્યા અને જાહેરમાં વરઘોડો કાઢી કાયદો-વ્યવસ્થાનો કડક સંદેશ આપ્યો.

અમદાવાદના ઢાલગરવાડ વિસ્તારમાં ગુનાખોરી પ્રવૃત્તિઓ સામે પોલીસની કડક કાર્યવાહી જોવા મળી છે. ગઈકાલે, 7 થી 8 જેટલા લુખા તત્વોએ એક દુકાનમાં ઘૂસીને ભારે તોડફોડ કરી હતી, જેના કારણે સ્થાનિક વેપારીઓમાં ભયનો માહોલ સર્જાયો હતો.

આ ઘટનાની જાણ થતાં જ કારંજ પોલીસ તાત્કાલિક એક્શનમાં આવી હતી. પોલીસે ઘટના સ્થળે પહોંચી આરોપીઓને ઝડપી પાડવા માટે સઘન તપાસ હાથ ધરી હતી. પોલીસે ખૂબ જ ઓછા સમયમાં તમામ આરોપીઓને દબોચી લીધા હતા.

પોલીસે પકડાયેલા આરોપીઓને જાહેરમાં લઈ જઈ તેમનો વરઘોડો કાઢ્યો હતો. પોલીસની આ કાર્યવાહીથી ગુનેગારોમાં કાયદાનો ડર બેઠો છે. આ ઘટના બાદ સ્થાનિક વેપારીઓમાં ખુશીનો માહોલ જોવા મળ્યો છે અને કાયદો-વ્યવસ્થા પર તેમનો વિશ્વાસ વધુ મજબૂત બન્યો છે.