હવામાન વિભાગની આગાહી: ગુજરાતમાં આગામી ૭ દિવસ હળવાથી મધ્યમ વરસાદની સંભાવના, ગરમી અને ઉકળાટ વધશે

હવામાન વિભાગ દ્વારા રાજ્યમાં આગામી સાત દિવસ સુધી હળવાથી મધ્યમ વરસાદની આગાહી કરવામાં આવી છે. હાલમાં રાજ્યમાં ભારે કે અતિભારે વરસાદની કોઈ સંભાવના નથી. ચોમાસાની વિદાય સાથે, આગામી દિવસોમાં તાપમાનમાં વધારો થવાની અને ગરમી તેમજ ઉકળાટ અનુભવાવાની શક્યતા છે. જોકે, દક્ષિણ ગુજરાતના કેટલાક વિસ્તારોમાં છૂટાછવાયા વરસાદી ઝાપટાં ચાલુ રહી શકે છે.

હવામાન વિભાગના વૈજ્ઞાનિક રામશ્રય યાદવના જણાવ્યા અનુસાર, ગુજરાતની આસપાસ વેસ્ટર્ન ડિસ્ટર્બન્સ સક્રિય છે. આ સિસ્ટમ ૭૪ ડિગ્રી પૂર્વ રેખાંશ અને ૨૬ ડિગ્રી ઉત્તર અક્ષાંશ પર સ્થિત છે. રાજ્યના જમીની વિસ્તારોમાં પવનની દિશા મુખ્યત્વે દક્ષિણ-પશ્ચિમથી પશ્ચિમ તરફની રહેશે.

સૌરાષ્ટ્ર અને કચ્છ વિસ્તારમાં આગામી ચાર દિવસ સુધી વાતાવરણ સૂકું રહેવાની સંભાવના છે. ત્યારબાદના ત્રણ દિવસ દરમિયાન આ વિસ્તારોમાં પણ હળવાથી મધ્યમ વરસાદ પડી શકે છે. રાજ્યના અન્ય ભાગોમાં પણ છૂટાછવાયા વરસાદી ઝાપટાં ચાલુ રહેવાની શક્યતા છે.