ભિલોડામાં શ્રીનાથ સોસાયટીમાંથી વિશાળ અજગરનું સફળ રેસ્ક્યુ

ભિલોડા શહેરમાં શ્રીનાથ સોસાયટી વિસ્તારમાં આજે વહેલી સવારે એક રહેણાંક મકાનના જાળિયામાં વિશાળ અજગર દેખાતા સ્થાનિક પરિવારજનોમાં ભય ફેલાયો હતો. અજગરને જોઈને લોકોમાં ગભરાટ વ્યાપી ગયો હતો.

ઘટનાની જાણ થતાં જ વન વિભાગની ટીમ તાત્કાલિક ઘટનાસ્થળે દોડી આવી હતી. વન વિભાગના કર્મચારીઓએ લગભગ એક કલાકની જહેમત બાદ આ વિશાળ અજગરને સફળતાપૂર્વક પકડી પાડ્યો હતો.

વન વિભાગ દ્વારા અજગરને સુરક્ષિત રીતે તેના કુદરતી આવાસમાં છોડી દેવામાં આવ્યો હતો. વન વિભાગની સમયસર અને સરાહનીય કામગીરી બદલ સ્થાનિક રહીશોએ ટીમના સભ્યોનો આભાર વ્યક્ત કર્યો હતો.