સુરતમાં સ્કૂલ વાનના ડ્રાઈવર પર રખડતા શ્વાનનો જીવલેણ હુમલો, સીસીટીવીમાં કેદ

સુરતમાં રખડતા શ્વાનોનો આતંક સતત વધી રહ્યો છે. તાજેતરમાં ડિંડોલી વિસ્તારમાં સણિયા ઇકલેરા ચોકડી પાસે એક સ્કૂલ વાનના ડ્રાઈવર પર રખડતા શ્વાને જીવલેણ હુમલો કર્યો હતો. આ સમગ્ર ઘટના નજીકના સીસીટીવી કેમેરામાં કેદ થઈ હતી, જેના ફૂટેજ હાલ સોશિયલ મીડિયા પર ખૂબ વાયરલ થઈ રહ્યા છે.

પ્રાપ્ત માહિતી અનુસાર, ૨૪ સપ્ટેમ્બરના રોજ સવારે આશરે ૮ વાગ્યે ૨૬ મિનિટે એક મહિલા પોતાના નાના બાળકને સ્કૂલ વાનમાં બેસાડવા માટે આવી હતી. તે સમયે વાનનો ડ્રાઈવર પોતાની સીટ પાસે નીચે ઊભો હતો. જેવી મહિલા બાળકને વાનમાં બેસાડવા લાગી, તેટલામાં જ પાછળથી દોડતો આવેલો એક શ્વાન કોઈ પણ ઉશ્કેરણી વગર સીધો ડ્રાઈવર પર ત્રાટક્યો હતો.

શ્વાનનો હુમલો એટલો આક્રમક હતો કે તેણે ડ્રાઈવરને પગમાં બચકું ભરી લીધું હતું. જેના કારણે ડ્રાઈવર પોતાનું સંતુલન ગુમાવીને જમીન પર પટકાયો હતો. ડ્રાઈવર નીચે પડી ગયા બાદ પણ શ્વાને તેનો હુમલો ચાલુ રાખ્યો હતો અને પગ બાદ તેના હાથ પર પણ ગંભીર રીતે બચકાં ભર્યા હતા. ભારે જહેમત બાદ ડ્રાઈવર શ્વાનના પંજામાંથી છૂટી શક્યો હતો. આ ભયાવહ દ્રશ્ય જોઈને બાળકને મૂકવા આવેલી મહિલા પણ ગભરાઈને ત્યાંથી નાસી છૂટી હતી.