હિંમતનગર નજીક ગરનાળામાં ડૂબી જવાથી બે યુવાનોના કરુણ મોત

સાબરકાંઠા જિલ્લાના હિંમતનગર નજીક કાંકણોલ નેશનલ હાઇવે પર એક અત્યંત કમનસીબ અને વિચિત્ર અકસ્માતની ઘટના સામે આવી છે. હાઇવે પર આવેલા ગરનાળાની પ્રોટેક્શન વોલ સાથે બાઇક અથડાતાં સર્જાયેલી દુર્ઘટનામાં ગરનાળાના ઊંડા પાણીમાં ડૂબી જવાથી બે યુવાનોના કરુણ મોત નિપજ્યા છે.

મળતી માહિતી મુજબ, ગામડી ગામનો એક યુવક પોતાના સાથીદાર સાથે બાઇક પર જાદરના પરંપરાગત મેળામાં જવા માટે નીકળ્યો હતો. દરમિયાન હિંમતનગર નજીક કાંકણોલ પાસે નેશનલ હાઇવે પર બાઇક પરનો કાબૂ ગુમાવતાં બાઇક પુરઝડપે ગરનાળાની પ્રોટેક્શન વોલ (સુરક્ષા દીવાલ) સાથે ધડાકાભેર અથડાઈ હતી.

અથડામણ એટલી ભયાનક હતી કે બાઇકચાલક યુવક ઉછળીને સીધો ગરનાળા નીચે ભરાયેલા ઊંડા પાણીમાં જઈ પડ્યો હતો. આઘાતજનક રીતે, તેને બચાવવા જતાં તેનો મિત્ર પણ ઊંડા પાણીમાં ગરકાવ થઈ ગયો અને બંને યુવાનોના મોત થયા.