અમરેલી: વાંકીયા નદીમાંથી રેતીચોરી કરતા બે ડમ્પર અને ટ્રેક્ટર ઝડપાયા, ખાણ-ખનીજ વિભાગની કાર્યવાહી

અમરેલી જિલ્લામાં શેત્રુંજી નદીમાંથી થતી ગેરકાયદે રેતીચોરીની ફરિયાદોને પગલે જિલ્લા કલેક્ટરના માર્ગદર્શન હેઠળ ખાણ-ખનીજ વિભાગ દ્વારા સઘન કાર્યવાહી હાથ ધરવામાં આવી છે. રોયલ્ટી ઈન્સ્પેક્ટર કે.એમ. સોલંકીની આગેવાની હેઠળની ટીમે વાંકીયા સહિતના વિસ્તારોમાં તપાસ અભિયાન ચલાવ્યું હતું.

આ તપાસ દરમિયાન, ખાણ-ખનીજ વિભાગની ટીમે રેતીચોરીના ગેરકાયદે પ્રવૃત્તિમાં સંડોવાયેલા બે ડમ્પર અને એક ટ્રેક્ટરને ઝડપી પાડ્યા હતા. વાંકીયા અને તેની આસપાસના વિસ્તારોમાં રેતીચોરીનું મોટું નેટવર્ક સક્રિય હોવાની બાતમીના આધારે આ કાર્યવાહી કરવામાં આવી હતી અને આ મામલે વધુ તપાસ હાથ ધરવામાં આવી રહી છે.

ખાણ-ખનીજ વિભાગના સૂત્રો પાસેથી મળતી માહિતી મુજબ, ચાલુ માસ દરમિયાન રેતીચોરી સંબંધિત કુલ ૨૩ જેટલા કેસ નોંધવામાં આવ્યા છે. આ કેસોમાં નિયમ મુજબ દંડનીય કાર્યવાહી અને દંડની વસૂલાતની પ્રક્રિયા પણ હાથ ધરવામાં આવી રહી છે, જેનાથી ગેરકાયદે રેતી ખનન પ્રવૃત્તિ પર અંકુશ લાવી શકાય.