હાલરીયા ગામે કાઠી ક્ષત્રિય સમાજની મિટિંગ: શિક્ષણ ભવન માટે રૂ. ૩૧ લાખનું અનુદાન પ્રાપ્ત

ધારી-બગસરા અમરેલી ચલાલા પંથકના હાલરીયા ગામે લવકુભાઈ વાળાની વાડી ખાતે કાઠી ક્ષત્રિય સમાજની એક મહત્વપૂર્ણ મિટિંગનું આયોજન કરવામાં આવ્યું હતું. આ બેઠકનો મુખ્ય ઉદ્દેશ ગાંધીનગર ખાતે નિર્માણ પામી રહેલા કાઠી ક્ષત્રિય સમાજના શિક્ષણ ભવન અંગે વિસ્તૃત ચર્ચા-વિચારણા કરવાનો હતો.

આ મિટિંગમાં સમાજના અગ્રણી આગેવાનો અને ઉદાર દાતાશ્રીઓ મોટી સંખ્યામાં ઉપસ્થિત રહ્યા હતા. સમાજમાં શિક્ષણનું પ્રમાણ વધુને વધુ વધે અને વિદ્યાર્થીઓને ઉચ્ચ ગુણવત્તાયુક્ત શિક્ષણ માટે શ્રેષ્ઠ સુવિધાઓ ઉપલબ્ધ થાય તે હેતુથી શિક્ષણ ભવનના નિર્માણ કાર્યમાં સહયોગ આપવા માટે દાતાશ્રીઓએ યથાશક્તિ દાન આપ્યું હતું.

આ પ્રસંગે યોજાયેલા કાર્યક્રમ દરમિયાન, દાતાશ્રીઓ તરફથી કુલ રૂ. ૩૧ લાખનું અનુદાન પ્રાપ્ત થયું હતું. સમાજના આગેવાનો દ્વારા આ ઉદારતા બદલ તમામ દાતાશ્રીઓનો હૃદયપૂર્વક આભાર વ્યક્ત કરવામાં આવ્યો હતો. વધુમાં, શિક્ષણ ક્ષેત્રે સમાજને પ્રગતિના પંથે આગળ લઈ જવા માટે સૌને નિરંતર સહયોગ આપવા માટે અપીલ કરવામાં આવી હતી.