તલોદ નજીક ગોટા ફેક્ટરી પાસે ટ્રક પલટી: રસ્તાના ખાડા બન્યા અકસ્માતનું કારણ

તલોદ નજીક ગોટા ફેક્ટરી પાસે આજે સવારે ૮:૦૦ વાગ્યે નોટ-કાપચી ભરેલો એક હેવી ટ્રક રસ્તા પર પલટી ખાઈ ગયો હતો. આ ઘટના બાદ સ્થાનિકોમાં ભારે રોષ જોવા મળ્યો હતો. સદનસીબે, આ અકસ્માતમાં કોઈ જાનહાનિ થઈ નથી.

પ્રત્યક્ષદર્શીઓ અને સ્થાનિકોના જણાવ્યા અનુસાર, રસ્તાની બાજુમાં આવેલા મોટા-મોટા ખાડાઓને કારણે વારંવાર આવા ભયાનક અકસ્માતો સર્જાય છે. આ ખાડાઓ વાહનચાલકો માટે જોખમી સાબિત થઈ રહ્યા છે અને અકસ્માતનું મુખ્ય કારણ બની રહ્યા છે.

સ્થાનિક રહેવાસીઓએ આ અંગે તંત્રને અવારનવાર રજૂઆતો કરી છે અને રસ્તા પરના ખાડાઓ પુરવાની માંગ કરી છે. તેમ છતાં, વહીવટી તંત્ર દ્વારા આ બાબતે આંખ આડા કાન કરવામાં આવી રહ્યા છે. લોકોમાં એવી ચર્ચા છે કે શું તંત્ર કોઈ મોટી દુર્ઘટના કે નિર્દોષનો ભોગ લેવાવાની રાહ જોઈ રહ્યું છે.