ખેડબ્રહ્મા પોલીસે ઘરફોડ ચોરીના રૂ. ૫.૭૨ લાખના મુદ્દામાલ મૂળ માલિકને પરત સોંપ્યો

સાબરકાંઠા જિલ્લાના ખેડબ્રહ્મા પોલીસ સ્ટેશન દ્વારા 'તેરા તુજકો અર્પણ' કાર્યક્રમ અંતર્ગત એક પ્રશંસનીય કામગીરી કરવામાં આવી છે. ઘરફોડ ચોરીના ગુનામાં રિકવર કરવામાં આવેલ રૂ. ૫,૭૨,૩૭૦/- ની કિંમતનો સોના તથા ચાંદીનો મુદ્દામાલ તેના મૂળ માલિકને વિધિવત રીતે પરત સોંપવામાં આવ્યો છે.

ગાંધીનગર વિભાગના નાયબ પોલીસ મહાનિરીક્ષક શ્રી વિરેન્દ્રસિંહ યાદવ તથા સાબરકાંઠા જિલ્લા પોલીસ અધિક્ષક ડો. પાર્થરાજસિંહ ગોહિલ (IPS) દ્વારા મિલકત સંબંધિત ગુનાઓ અટકાવવા અને વણશોધાયેલા ગુનાઓ ઉકેલવા માટે ખાસ સૂચના આપવામાં આવી હતી. આ સૂચનાઓના અનુસંધાને ખેડબ્રહ્મા વિભાગના નાયબ પોલીસ અધિક્ષક ડો. કુલદીપ નાયીના માર્ગદર્શન હેઠળ કાર્યવાહી હાથ ધરવામાં આવી હતી.

ખેડબ્રહ્મા પોલીસ ઇન્સ્પેક્ટર શ્રી ડી. વી. હડાત તથા તેમની સર્વેલન્સ ટીમે પેટ્રોલીંગ દરમિયાન ઘરફોડ ચોરીનો ગુનો શોધી કાઢ્યો હતો અને તે દરમિયાન ચોરી થયેલ મુદ્દામાલ જપ્ત કરવામાં આવ્યો હતો. આ જપ્ત કરાયેલ મુદ્દામાલની કિંમત રૂ. ૫,૭૨,૩૭૦/- જેટલી થાય છે, જેમાં સોના અને ચાંદીના દાગીનાનો સમાવેશ થાય છે.

પોલીસે આ મુદ્દામાલની તપાસ બાદ તેને તેના મૂળ માલિકની ઓળખ કરીને તેમને સોંપવાની કાર્યવાહી હાથ ધરી હતી. 'તેરા તુજકો અર્પણ' કાર્યક્રમ હેઠળ આ મુદ્દામાલ મૂળ માલિકને પરત સોંપવામાં આવતા પોલીસની કામગીરીને બિરદાવવામાં આવી હતી. આ કાર્યવાહીથી પોલીસ પ્રત્યે લોકોનો વિશ્વાસ વધુ દ્રઢ બન્યો છે.