સુરત મનપામાં મોટા ફેરફારો: ડેપ્યુટી મ્યુનિસિપલ કમિશનર સ્મિત લોઢાને સોલિડ વેસ્ટ મેનેજમેન્ટનો ચાર્જ

સુરત મહાનગરપાલિકાના વહીવટી તંત્રની કામગીરીને વધુ ગતિશીલ અને અસરકારક બનાવવા માટે મ્યુનિસિપલ કમિશનર દ્વારા મહત્વના ફેરફારો કરવામાં આવ્યા છે. સેન્ટ્રલ એસ્ટાબ્લિશમેન્ટ ડિપાર્ટમેન્ટ દ્વારા જારી કરાયેલા નવા ઓફિસ ઓર્ડર મુજબ, ડેપ્યુટી મ્યુનિસિપલ કમિશનર અને IAS અધિકારી સ્મિત સંતોષ લોઢાને આગામી આદેશ ન થાય ત્યાં સુધી સોલિડ વેસ્ટ મેનેજમેન્ટ ડિપાર્ટમેન્ટનો સંપૂર્ણ અંકુશ અને સુપરવિઝન સોંપવામાં આવ્યું છે. સુરત શહેરની સ્વચ્છતા, કચરાના નિકાલ અને પ્રોસેસિંગની કામગીરીને વધુ સુદ્રઢ કરવાના હેતુથી આ નિર્ણય લેવાયો છે.

આ ફેરફારો માત્ર વહીવટી અધિકારીઓ પૂરતા સીમિત નથી, પરંતુ ટેકનિકલ સંવર્ગના અધિકારીઓની જવાબદારીઓમાં પણ વધારો કરવામાં આવ્યો છે. પૂર્વ ઝોન (વરાછા)ના એક્ઝિક્યુટિવ એન્જિનિયર (સિવિલ) મૌલિક એમ. રાવને તેમની મૂળ ફરજોની સાથે સોલિડ વેસ્ટ મેનેજમેન્ટ વિભાગમાં વધારાની કામગીરી સોંપવામાં આવી છે. તેઓ પોતાની હાલની જવાબદારીઓ ઉપરાંત આ નવો ચાર્જ સંભાળશે.

પાલિકાના આદેશ મુજબ, એક્ઝિક્યુટિવ એન્જિનિયર મૌલિક રાવનો પગાર તેમની મૂળ પોસ્ટિંગ એટલે કે પૂર્વ ઝોન (વરાછા)માંથી જ આહરિત કરવામાં આવશે. આ પગલાં દ્વારા સુરત મહાનગરપાલિકા તેના નાગરિકોને વધુ સારી સ્વચ્છતા સેવાઓ પૂરી પાડવા અને કચરા વ્યવસ્થાપનમાં સુધારા લાવવા પ્રતિબદ્ધ જણાય છે.