ધારીમાં બજરંગ ગ્રુપ દ્વારા ગણેશ ઉત્સવનું ભવ્ય આયોજન: શોભાયાત્રા બાદ ભવ્ય સ્થાપના

ધારી શહેરમાં સેવાકીય સંસ્થા બજરંગ ગ્રુપ દ્વારા ગણેશ ઉત્સવનું ભવ્ય આયોજન કરવામાં આવ્યું છે. ગણેશ ચતુર્થીના પવિત્ર પર્વ નિમિત્તે, બજરંગ ગ્રુપના પ્રમુખ અને ધારી નગરપાલિકાના ઉપપ્રમુખ પરેશભાઈ પટણીના નિવાસસ્થાનેથી ભગવાન શ્રી ગણેશજીની ભવ્ય શોભાયાત્રાનું પ્રસ્થાન થયું હતું.

આ શોભાયાત્રા ઢોલ-નગારાના સુમધુર તાલ અને 'ગણપતિ બાપ્પા'ના જયઘોષ સાથે નીકળી હતી, જેમાં મોટી સંખ્યામાં ધારીના નાગરિકો જોડાયા હતા. શોભાયાત્રા સંપન્ન થયા બાદ, શ્રી જી. એન. દામાણી હાઈસ્કૂલ ખાતે ‘બજરંગ ગ્રુપ કા રાજા’ નામ હેઠળ ભગવાન શ્રી ગણેશજીની ભવ્ય પ્રતિમાની સ્થાપના કરવામાં આવી હતી.

આ ધાર્મિક અને ઉત્સાહપૂર્ણ પ્રસંગે ધારી નગરપાલિકાના કારોબારી ચેરમેન અને પૂર્વ ધારાસભ્ય મનસુખભાઈ ભુવા, ધારી તાલુકા ભાજપ પ્રમુખ મૃગેશભાઈ કોટડીયા, ધારી તાલુકા ભાજપ મહામંત્રી મુકેશભાઈ રૂપારેલિયા, હિનાબેન રાવળ, નિર્મલાબેન લુણગાતર, નગરપાલિકા સદસ્ય ધર્મેન્દ્રભાઈ લહેરૂ, બાલાભાઈ વાડદોરીયા સહિત અનેક રાજકીય આગેવાનો, કાર્યકરો અને મોટી સંખ્યામાં ધારીવાસીઓ ઉપસ્થિત રહ્યા હતા.

સમગ્ર વાતાવરણ ‘ગણપતિ બાપ્પા મોરિયા’ના જયઘોષથી ગુંજી ઉઠ્યું હતું, જે આ ઉત્સવના ઉલ્લાસ અને ભક્તિભાવને દર્શાવે છે.