નાની કુંડળ ગામે પોલીસ લોક દરબાર: સાયબર ફ્રોડ અને કાયદો-વ્યવસ્થા અંગે માર્ગદર્શન

બાબરા પોલીસ સ્ટેશન દ્વારા નાની કુંડળ ગામે ગ્રામ પંચાયતના સહયોગથી એક ભવ્ય 'લોક દરબાર'નું આયોજન કરવામાં આવ્યું હતું. પોલીસ અને પ્રજા વચ્ચેના સંવાદને વધુ મજબૂત બનાવવા તથા ગામમાં સુરક્ષાનું વાતાવરણ જાળવી રાખવાના ઉમદા હેતુથી આયોજિત આ કાર્યક્રમમાં મોટી સંખ્યામાં ગ્રામજનો ઉપસ્થિત રહ્યા હતા.

આ લોક દરબારમાં બાબરા પોલીસ સ્ટેશનના પી.એસ.આઈ. ડાંગર સાહેબ, હેડ કોન્સ્ટેબલ યોગેશભાઈ પરમાર અને કોન્સ્ટેબલ રાજુભાઈ ભૂકણ સહિત બાબરા તાલુકા પંચાયતના કારોબારી ચેરમેન માધવભાઈ કટારીયા, સરપંચ વિનોદભાઈ તલાવડીયા, ઉપસરપંચ અશ્વિનભાઈ સોલંકી, ગ્રામ પંચાયતના સભ્યો અને મોટી સંખ્યામાં ગ્રામજનો ઉપસ્થિત રહ્યા હતા.

કાર્યક્રમ દરમિયાન, પોલીસ અધિકારીઓએ હાલમાં વધી રહેલા સાયબર ફ્રોડ અને ઓનલાઈન છેતરપિંડીથી બચવા માટેના અસરકારક ઉપાયો અંગે ગ્રામજનોને સરળ ભાષામાં વિસ્તૃત માર્ગદર્શન પૂરું પાડ્યું હતું. તેમણે અજાણ્યા વ્યક્તિઓ સાથે બેંક વિગતો કે અન્ય અંગત માહિતી શેર ન કરવા અને ઓનલાઈન વ્યવહારો કરતી વખતે અત્યંત સાવચેતી રાખવા પર ભાર મૂક્યો હતો.

આ ઉપરાંત, ગામમાં કાયદો અને વ્યવસ્થા સુપેરે જળવાઈ રહે તથા કોઈપણ પ્રકારની ગુનાહિત પ્રવૃત્તિઓને અટકાવી શકાય તે માટે જરૂરી કાનૂની સૂચનો પણ આપવામાં આવ્યા હતા. આ લોક દરબારના માધ્યમથી પોલીસ અને ગ્રામજનો વચ્ચે સીધો સંવાદ સ્થાપિત થયો હતો, જેના કારણે સ્થાનિક પ્રશ્નો અને સુરક્ષા સંબંધિત બાબતો પર પણ ખુલ્લી ચર્ચા થઈ શકી હતી.