ખેરાલુ-સિધ્ધપુર હાઇવે પર ખાડાઓને કારણે વાહનચાલકો પરેશાન, ભાદરી પૂનમ પહેલા સમારકામની માંગ

ખેરાલુ-સિધ્ધપુર હાઇવે પર રોડની અત્યંત ખરાબ સ્થિતિને કારણે વાહનચાલકોને ભારે મુશ્કેલીનો સામનો કરવો પડી રહ્યો છે. રોડ પર પડેલા અનેક ખાડાઓને કારણે વાહનવ્યવહાર ખોરવાઈ ગયો છે અને લોકોને રોજિંદી કામગીરીમાં પણ અડચણ આવી રહી છે.

સ્થાનિક રહેવાસીઓએ જણાવ્યું કે, ભાદરી પૂનમનો મેળો નજીક આવી રહ્યો છે અને તે પહેલા રોડ પરના ખાડાઓ પૂરી દેવામાં આવે તેવી તેમની તાત્કાલિક માંગ છે. આ ખાડાઓને કારણે મુસાફરોને ભારે હાલાકી વેઠવી પડે છે.

ગઈકાલે રાત્રે પણ અનેક વાહનોને આ ખાડાઓને કારણે નુકસાન થયું હતું. એટલું જ નહીં, બાઇક સવારો પણ ખાડામાં પડી જવાથી ઇજાગ્રસ્ત થયા હતા. એક ગંભીર રીતે ઇજાગ્રસ્ત થયેલા બાઇક સવારને વધુ સારવાર માટે સિવીલ હોસ્પિટલ ખાતે ખસેડવામાં આવ્યા હતા.