વાગરામાં એક્સપાયરી માલના આક્ષેપો બાદ તંત્રની કાર્યવાહી: સાવરિયા જનરલ સ્ટોર બંધ રાખવા આદેશ

વાગરામાં એક્સપાયરી ડેટવાળો માલસામાન વેચવામાં આવતો હોવાના ગંભીર આક્ષેપો સામે આવ્યા બાદ સ્થાનિક વહીવટી તંત્ર એક્શનમાં આવ્યું છે. આ મામલે તંત્ર દ્વારા તાત્કાલિક ધોરણે કડક કાર્યવાહી હાથ ધરવામાં આવી છે.

ઘટનાની વિગતો મુજબ, વાગરા મામલતદારની ટીમે સ્થાનિક સાવરિયા જનરલ સ્ટોરમાં ઓચિંતું ચેકિંગ હાથ ધર્યું હતું. એક્સપાયરી ડેટવાળો સામાન વેચવાના આક્ષેપોને પગલે મામલતદારની ટીમે દુકાનમાં રહેલા જથ્થાની ઝીણવટભરી તપાસ કરી હતી.

વહીવટી તંત્ર દ્વારા આ મામલે કડક વલણ અપનાવવામાં આવ્યું છે. જ્યાં સુધી ફૂડ વિભાગની ટીમ આ સ્ટોર પર આવીને જરૂરી સેમ્પલ ન લે, ત્યાં સુધી સાવરિયા જનરલ સ્ટોરને બંધ રાખવાનો આદેશ આપવામાં આવ્યો છે. ફૂડ વિભાગની તપાસ બાદ જ આગળની કાર્યવાહી નક્કી કરવામાં આવશે.