સુરતના પીપલોદમાં 'સ્ક્વિડ ગેમ' થીમવાળો ગણપતિ પંડાલ, પર્યાવરણ જાગૃતિ સાથે

સુરતના પીપલોદ વિસ્તારમાં આવેલી ભાગ્યલક્ષ્મી સોસાયટીમાં આ વર્ષે ગણેશોત્સવ માટે અનોખું અને આકર્ષક આયોજન કરવામાં આવ્યું છે.

અહીં પ્રખ્યાત વેબ સિરીઝ 'સ્ક્વિડ ગેમ'ની થીમ પર આધારિત શાનદાર ગણપતિ પંડાલ તૈયાર કરવામાં આવ્યો છે. પંડાલમાં સિરીઝની જાણીતી વિશાળ ઢીંગલી અને ગ્રીન ટ્રેકસૂટ પહેરેલા સ્પર્ધકોના વિશાળ કટઆઉટ્સ ઊભા કરવામાં આવ્યા છે, જે આવનાર દરેક ભક્ત અને મુલાકાતીઓનું ધ્યાન ખેંચી રહ્યા છે.

આ થીમ માત્ર મનોરંજન પૂરતી સીમિત ન રહી, 'પ્રકૃતિનું સ્ક્વિડ ગેમ' શીર્ષક હેઠળ પર્યાવરણ અને સામાજિક જાગૃતિનો મહત્વપૂર્ણ સંદેશ આપવામાં આવ્યો છે. પંડાલના બેકગ્રાઉન્ડ બેનર્સ પર પ્લાસ્ટિકનો વપરાશ ઘટાડવો, ગંદકી ન કરવી, ટ્રાફિકના નિયમોનું પાલન કરવું, વધુ વૃક્ષો વાવવું અને પાણી બચાવવું જેવા જીવનજરૂરી સંદેશાઓ પ્રદર્શિત કરવામાં આવ્યા છે.

આ આધ્યાત્મિકતા સાથે પર્યાવરણ સંરક્ષણની અનોખી પહેલ સ્થાનિક લોકોમાં ભારે પ્રશંસા મેળવી રહી છે અને સમુદાયમાં પર્યાવરણ જાગૃતિ ફેલાવવાની પ્રેરણા આપી રહી છે.