રાપરના ફતેહગઢ નજીક ઘેટાં-બકરાં ચોરવા આવેલા બે અજ્ઞાત શખ્સોએ માલધારી પર કર્યું ફાયરિંગ

કચ્છ જિલ્લાના રાપર તાલુકામાં કાયદો અને વ્યવસ્થાને પડકાર ફેંકતી એક ચોંકાવનારી ઘટના સામે આવી છે. રાપરના ફતેહગઢ નજીક આવેલા ભોજનારી-ડેમ પાસે મધરાતે બાઈક લઈને ઘેટાં-બકરાં ચોરી કરવાના ઈરાદે આવેલા બે અજ્ઞાત શખ્સોએ એક માલધારી પર ફાયરિંગ કર્યું હતું. આ હુમલો કર્યા બાદ બંને આરોપીઓ ઘટનાસ્થળેથી નાસી છૂટ્યા હતા.

મળતી માહિતી મુજબ, રાત્રિના સમયે જ્યારે માલધારી પોતાના પશુઓ સાથે હાજર હતા, ત્યારે મોટર સાયકલ પર સવાર થઈને બે અજાણ્યા શખ્સો ત્યાં આવી પહોંચ્યા હતા. આ શખ્સોનો ઈરાદો ઘેટાં અને બકરાંની ચોરી કરવાનો હતો. જોકે, માલધારી દ્વારા પ્રતિકાર કરવામાં આવતા ચોરી કરવા આવેલા શખ્સોએ તેમના પર સીધું ફાયરિંગ કરી દીધું હતું.

આ ગોળીબારની ઘટનાને અંજામ આપ્યા બાદ બંને અજ્ઞાત હુમલાખોરો પોતાની મોટર સાયકલ પર ત્યાંથી ફરાર થઈ ગયા હતા. આ ઘટનાને પગલે સ્થાનિક પંથકમાં ભારે ચકચાર મચી ગઈ છે.