ଶଙ୍ଖ ନଦୀରେ ବୁଡ଼ିଗଲେ ୩ ଶିଶୁ କନ୍ୟା, କର୍ମା ପୂଜା ପାଇଁ ବାଲି ଆଣିବାକୁ ଯାଇଥିଲେ

ଗାଁର ପରମ୍ପରା ଓ ରୀତିନୀତି ଅନୁସାରେ କର୍ମା ପୂଜା ପାଇଁ ଶଙ୍ଖ ନଦୀରୁ ବାଲି ଆଣିବାକୁ ଗ୍ରାମବାସୀ ଯାଇଥିଲେ। ସେମାନଙ୍କ ସହିତ ବହୁତ ପିଲା ବି ବାଲି ଆଣିବାକୁ ଯାଇଥିଲେ। ପୂଜା ସାମଗ୍ରୀ ଓ ବାଲି ନେବା ପରେ ଅଧିକାଂଶ ଲୋକ ଘରକୁ ଫେରି ଆସିଥିଲେ। ମାତ୍ର ୬ ରୁ ୮ ବର୍ଷ ବୟସର ତିନି ଜଣ ଝିଅ ନଦୀ ପାଖରେ ରହିଯାଇଥିଲେ। ଯାହା ଜଣାପଡ଼ିଛି, ସେମାନେ ଖେଳିବା ଉଦ୍ଦେଶ୍ୟରେ ହେଉ ଅବା ଗାଧୋଇବା ପାଇଁ ଯାଇ ବୁଡ଼ି ଯାଇଛନ୍ତି। କାରଣ ଜଳର ସ୍ରୋତ ଅଧିକ ରହିଥିଲା।

ପିଲାମାନେ ଗାଁକୁ ନଫେରିବାରୁ ଖୋଜାଖୋଜି ଆରମ୍ଭ ହୋଇଥିଲା ଏବଂ ପରେ ତିନି ଜଣଙ୍କୁ ନଦୀରୁ ଉଦ୍ଧାର କରାଯାଇଥିଲା। ପରିବାର ଲୋକେ ଗ୍ରାମବାସୀଙ୍କ ସହାୟତାରେ ସେମାନଙ୍କୁ ତୁରନ୍ତ ବୀରମିତ୍ରପୁର ଡାକ୍ତରଖାନାକୁ ନେଇଥିଲେ। କିନ୍ତୁ ସେତେବେଳକୁ ବହୁତ ଡେରି ହୋଇସାରିଥିଲା। ଡାକ୍ତରଖାନାରେ ଯାଞ୍ଚ ପରେ ଡାକ୍ତର ତିନି ଶିଶୁକନ୍ୟାଙ୍କୁ ମୃତ ଘୋଷଣା କରିଥିଲେ।ଏବେ ସମଗ୍ର ଅଞ୍ଚଳରେ ଗଣେଶ ପୂଜା, ନୂଆଁଖାଇ ଓ କର୍ମା ପୂଜାର ପର୍ବ ଆନନ୍ଦ-ଉଲ୍ଲାସର ସହ ପାଳନ କରାଯାଉଥିବା ବେଳେ, ଏହି ଦୁଃଖଦ ଘଟଣା ପରେ ସଲଙ୍ଗାବାହାଲ ଗାଁରେ ହସଖୁସି ସବୁ ଲୁହରେ ବଦଳି ଯାଇଛି। ପରିବାର ଲୋକଙ୍କ କାନ୍ଦବୋବାଳିରେ ପୂରା ଗାଁ କମ୍ପୁଛି।

ଅନ୍ୟପକ୍ଷରେ ଗଞ୍ଜାମ ଜିଲ୍ଲାର ଦୁଇଟି ପୃଥକ ପୃଥକ ସ୍ଥାନରେ ଆଜି ଗଣେଶ ମୂର୍ତ୍ତି ବିସର୍ଜନ ବେଳେ ୩ ଜଣ ସ୍କୁଲ ଛାତ୍ର ବୁଡ଼ି ଯାଇଛନ୍ତି। ଦିଗପହଣ୍ଡି ଥାନା ସିଦ୍ଧିଖଣ୍ଡିରେ ଗଣେଶ ମୂର୍ତ୍ତି ବିସର୍ଜନ ବେଳେ ପୋଖରୀରେ ବୁଡ଼ ଜଣେ ଅଷ୍ଟମ ଶ୍ରେଣୀ ଛାତ୍ରଙ୍କ ମୃତ୍ୟୁ ଘଟିଛି। ସେହିପରି ହିଞ୍ଜିଳିକାଟୁର ଘୋଡ଼ାହାଡ଼ ନଦୀରେ ଦୁଇ ଜଣ ଛାତ୍ର ବୁଡ଼ି ଯାଇଛନ୍ତି।