નવસારીના તીઘરા-ઈટાળવા સીમમાં દીપડાને ખુલ્લેઆમ લટાર મારતો વીડિયો વાયરલ, ખેડૂતોમાં ભારે ફાફડાટ

નવસારી તાલુકાના તીઘરા અને ઈટાળવા ગામની સીમમાંથી એક ચિંતાજનક સમાચાર સામે આવ્યા છે. આજે વહેલી સવારે ખેતર કિનારે શેડીના પાક પાસે એક આદમખોર દીપડો ખુલ્લેઆમ લટાર મારતો જોવા મળ્યો હતો. સ્થાનિકે આ દીપડાની તમામ હિલચાલ કેમેરામાં કેદ કરી લીધી છે. દિવસના અજવાળામાં જ ખેતરો પાસે દીપડો દેખાતા સીમ વિસ્તારમાં કામ કરવા જતા ખેડૂતો અને ખેતમજૂરોમાં ભારે દહેશત અને ભયનો માહોલ ફેલાઈ ગયો છે. અગાઉ પણ આ સીમ વિસ્તારમાં અવારનવાર દીપડાની હાજરી જોવા મળી છે. સ્થાનિકો દ્વારા વન વિભાગને તાત્કાલિક જાણ કરી પાંજરું ગોઠવી દીપડાને પાંજરે પૂરવાની માંગ કરવામાં આવી છે, જ્યારે સીમમાં જતા ખેડૂતોને અત્યારે સાવચેત રહેવા અપીલ કરાઈ છે.