ગુજરાત હાઈકોર્ટે ખાનગી હોસ્પિટલમાં સારવાર કરાવનાર સરકારી કર્મચારીના બિલ નકારી શકાય નહીં એમ નિર્ણય કર્યો

ગુજરાત હાઈકોર્ટે ચીફ પોસ્ટમાસ્ટર જનરલ દ્વારા દાખલ કરાયેલી અરજીને ફગાવીને સ્પષ્ટ કર્યું કે કટોકટી સમયે સારવાર ક્યાં લેવાઈ તેના કરતા સારવાર લેવાઈ તે વધુ મહત્વનું છે.

પોસ્ટ વિભાગના કર્મચારી ગણેશભાઈ રાઠોડને અચાનક છાતીમાં સખત દુખાવો ઉપડતા, તેમના પરિવારે તેમને નજીકની હોસ્પિટલમાં ખસેડ્યા. તબીબોની સલાહ મુજબ તેમને વધુ સારી સારવાર માટે સનશાઈન ગ્લોબલ હોસ્પિટલમાં દાખલ કરાયા.

મેડિકલ રિઈમ્બર્સમેન્ટ માટે અરજી કર્યા પછી, પોસ્ટ વિભાગે તે ફગાવી દીધી, કારણ કે સારવાર સરકાર દ્વારા માન્ય હોસ્પિટલમાં નહોતી. સેન્ટ્રલ એડમિનિસ્ટ્રેટિવ ટ્રિબ્યુનલ (CAT) એ અગાઉ કર્મચારીની તરફેણમાં ચુકાદો આપ્યો હતો, જે હાઈકોર્ટમાં પડકારાયો.

હાઈકોર્ટે જણાવ્યું કે કટોકટીના સમયે દર્દી અથવા તેના સંબંધીઓ પાસે સરકારી નિયમો જોવાનો સમય નથી; તેમનું પ્રાથમિક લક્ષ્ય જીવન બચાવવાનું હોય છે. નિષ્ણાત તબીબોની સલાહ મુજબ લેવાયેલી સારવારને માત્ર હોસ્પિટલનું નામ સરકારી યાદીમાં ન હોવાને કારણે નકારી ન શકાય. વધુમાં, હાઈકોર્ટે સ્પષ્ટ કર્યું કે સરકારને આર્થિક નુકસાન નહીં થાય, કારણ કે વળતરની રકમ ખાનગી હોસ્પિટલના વાસ્તવિક બિલ મુજબ નહીં, પરંતુ 2010ના ઓફિસ મેમોરેન્ડમ (OM)માં નિર્ધારિત દર મુજબ જ ચૂકવવામાં આવશે.