કોસંબા-તરસાડીમાં ટ્રાફિક બૂથથી માર્ગ ગૂંચવાયો

કોસંબા અને તરસાડી નગરના હૃદય સમાન ઝંડાચોક ચાર રસ્તા પર ટ્રાફિક નિયમન માટે વહીવટી તંત્ર દ્વારા રસ્તાની મધ્યમાં ટ્રાફિક બૂથ મૂકવામાં આવ્યું છે, જે સ્થાનિકો માટે આશીર્વાદ કરતાં નવું માથાનો દુખાવો બની રહ્યું છે.

આ માર્ગ રેલવે સ્ટેશન અને મુખ્ય બજારને જોડે છે અને રોજિંદા હજારો વાહનો તેમજ મોટા કન્ટેનર ટ્રકોની સતત અવરજવરનો સામનો કરે છે. બૂથને કોઈ ભૌગોલિક મૂલ્યાંકન વગર મધ્યમાં મૂકવામાં આવ્યો હોવાથી ટ્રાફિકની ગતિમાં અવરોધ અને ગૂંચવણની ચિંતા સ્થાનિકો વ્યક્ત કરે છે.

માર્ગ પહેલેથી જ સાંકડો છે, બંને બાજુ દુકાનો અને આડેધડ પાર્કિંગનું દબાણ છે. બૂથની હાજરીથી રેલવે સ્ટેશન તરફ વળતા ભારે વાહનો અને ટ્રકો માટે ટર્નિંગ સ્પેસ પૂરતી નથી, જેના કારણે વળાંક લેતા વાહનો ફસાઈ જાય છે અને લાંબી કતારો બને છે. સ્કૂલ-ઓફિસ સમય અને સાંજની ખરીદીની ઘડીઓમાં રાહદારી અને દ્વિચક્ર વાહનો માટે ગતિ સુરક્ષિત રહેતી નથી.

સ્થાનિકોનું માનવું છે કે બૂથ માત્ર લોખંડનું સ્ટ્રક્ચર ન રહી, કાયમી ટ્રાફિક પોલીસ અથવા ટ્રાફિક રેગ્યુલેશન બોર્ડ (TRB) ની તહેનાતી સાથે માર્ગમાંથી દબાણો દૂર કરીને નિયમન કરવામાં આવે તો જ તેનો આંશિક લાભ મળી શકે.