કડોદરા પલસાણા રોડ પર નાગરિક બચત અને ધિરાણ સહકારી મંડળીનું નવું ભવન નિર્માણ માટે ભૂમિપૂજન

કડોદરા પલસાણા રોડ પર કડોદરા વિભાગ નાગરિક બચત અને ધિરાણ સહકારી મંડળી લિમિટેડના નવા ભવનના નિર્માણ માટે ભૂમિપૂજન કાર્યક્રમ યોજાયો. આ પ્રસંગે મંડળીના પ્રમુખ ધર્મેશભાઈએ સંસ્થાના આગામી આયોજન, બાંધકામની વિગતો અને સભાસદો-ગ્રાહકો માટેની સુવિધાઓ વિશે માહિતી આપી.

મંડળી દ્વારા નવા ભવન માટે કુલ ૨,૪૫૦ ચોરસ વાર જમીન ખરીદવામાં આવી છે, જેના માટે આશરે ૬ કરોડ રૂપિયાનો ખર્ચ થયો છે. નવા ભવનનું અંદાજે ૨૭,૦૦૦ ચોરસ ફૂટ વિસ્તારમાં બાંધકામ થશે, જેના માટે આશરે ૪ થી ૪.૫ કરોડ રૂપિયાનો ખર્ચ થવાનો અંદાજ છે. આ રીતે જમીન સહિત સમગ્ર પ્રોજેક્ટનો કુલ ખર્ચ આશરે ૧૧ કરોડ રૂપિયા થવાની શક્યતા છે.

નવા ભવનમાં કુલ બાંધકામમાંથી આશરે 13,000 ચોરસ ફૂટ જગ્યા મંડળીની પોતાની કામગીરી અને વહીવટી ઓફિસ માટે વપરાશે, જ્યારે બાકીની 13,000 ચોરસ ફૂટ જગ્યા ભવિષ્યની જરૂરિયાતો માટે અનામત રાખવામાં આવશે અને જરૂર પડ્યે અન્ય બેંક કે સંસ્થાને ભાડે આપવાનો વિચાર છે. ડિઝાઇનમાં વરિષ્ઠ નાગરિકોની સુવિધા માટે મુખ્ય કામગીરી અને લોકર સહિતની સુવિધાઓ એક જ માળ પર મૂકવામાં આવી છે, તેમજ વિશાળ પાર્કિંગની વ્યવસ્થા પણ કરવામાં આવી છે.

ભૂમિપૂજન પછી હવે નવા ભવનનું બાંધકામ શરૂ થશે અને આગામી છ મહિનામાં તેને પૂર્ણ કરવાનો લક્ષ્યાંક છે. આધુનિક સુવિધાઓથી સજ્જ આ ભવન તૈયાર થયા બાદ મંડળીના સભાસદો અને ગ્રાહકોને વધુ ઝડપી, સરળ અને સારી સેવાઓ મળશે એવી અપેક્ષા છે.