સુરતમાં પ્લાસ્ટિક કચરાના નિકાલ માટે ઇકો-ફ્રેન્ડલી પ્રતિમા પ્રોત્સાહન અભિયાન શરૂ

સુરત મહાનગરપાલિકાના આરોગ્ય વિભાગે ગણેશોત્સવ પૂર્વે પર્યાવરણ સંરક્ષણ અને પ્લાસ્ટિક કચરાના વૈજ્ઞાનિક નિકાલ માટે અનોખી પહેલ શરૂ કરી છે. આ અભિયાન હેઠળ નાગરિકો 1 કિલો રિ‑યુઝ કરી શકાય તેવો પ્લાસ્ટિક કચરો જમા કરે તો તેમને માટીમાંથી બનેલી ઈકો‑ફ્રેન્ડલી શ્રીજીની પ્રતિમા વિનામૂલ્યે આપવામાં આવે છે.

સુરત શહેરના તમામ નવ ઝોનમાં કાર્યરત કલેક્શન સેન્ટરોમાં અત્યાર સુધીમાં અંદાજે 1200 કિલોથી વધુ પ્લાસ્ટિક કચરો એકત્રિત થયો છે. નાગરિકો પોતાના ઘર અને સ્ટોરરૂમમાં સંગ્રહિત બિનઉપયોગી પ્લાસ્ટિક ઉત્સાહપૂર્વક સેન્ટરો પર લાવી રહ્યા છે.

આ પ્રતિમાઓનું નિર્માણ સ્થાનિક સખી મંડળો દ્વારા કરવામાં આવ્યું છે. આરોગ્ય અધિકારી ડો. ઉમરીગરે જણાવ્યું કે, યુસીડી (અર્બન કોમ્યુનિટી ડેવલપમેન્ટ) વિભાગે સખી મંડળો સાથે સહકાર કરીને શાસ્ત્રોક્ત માટીની નાની પ્રતિમાઓ તૈયાર કરાવી હતી, જે મહિલા સશક્તિકરણ અને પર્યાવરણ જાગૃતિનું સંદેશ આપે છે.

પ્રારંભિક તબક્કે તૈયાર કરાયેલ 700 પ્રતિમાઓની સ્ટોક નાગરિકો દ્વારા ઝડપથી ખાલી થઈ ગઈ, જેના કારણે કોન્ટ્રાક્ટરો અને એજન્સીઓએ સખી મંડળો પાસેથી વધુ 500 પ્રતિમાઓ બનાવવા તાત્કાલિક ઓર્ડર આપ્યો છે.

શહેરમાં પ્લાસ્ટિક કચરાનો કાયમી નિકાલ સુનિશ્ચિત કરવા માટે તંત્ર હવે લાંબા ગાળાનું આયોજન કરી રહ્યું છે. આગામી દિવસોમાં એજન્સીઓ દ્વારા કાયમી કલેક્શન સેન્ટરો સ્થાપિત કરવામાં આવશે, જ્યાં નાગરિકોને નિયમિત પ્રોત્સાહક ઇનામો આપીને સ્વચ્છતા પ્રત્યેની ટેવ કેળવવામાં આવશે.