સુરતના ડીંડોલીમાં ચાલુ સિટી બસમાં બે વ્યક્તિઓ વચ્ચે ઉગ્ર મારામારી, ડ્રાઈવરે વચ્ચે પડી મામલો થાળે પાડ્યો

સુરત શહેરના ડીંડોલી સ્થિત નવાગામ વિસ્તારમાં ચાલુ સિટી બસની અંદર મારામારીની એક ચોંકાવનારી ઘટના સામે આવી છે. જાહેર માર્ગ પરથી પસાર થઈ રહેલી સિટી બસમાં અચાનક બે વ્યક્તિઓ વચ્ચે કોઈ બાબતે ઉગ્ર બોલાચાલી શરૂ થઈ હતી, જે જોતજોતામાં મારામારીમાં ફેરવાઈ ગઈ હતી.

બસની અંદર મુસાફરી કરી રહેલા અન્ય લોકોની હાજરીમાં જ બંને પક્ષો વચ્ચે મામલો બિચક્યો હતો. બંને વ્યક્તિઓ એકબીજા સાથે બાખડી પડતાં બસમાં સવાર અન્ય મુસાફરોમાં પણ થોડો સમય માટે ચિંતાનો માહોલ સર્જાયો હતો.

આ ઘટનાની ગંભીરતાને જોતા સિટી બસના ડ્રાઈવરે તાત્કાલિક સમયસૂચકતા વાપરી હતી. ડ્રાઈવરે રોડની વચ્ચે જ બસ ઊભી રાખી દીધી હતી અને અંદરોઅંદર ઝઘડી રહેલા લોકોને સમજાવીને મામલો શાંત પાડવાનો પ્રયાસ કર્યો હતો.