અમરેલી: ધારીના રહેણાંક વિસ્તારમાંથી દીપડો પાંજરે પુરાયો, સ્થાનિકોને હાશકારો

અમરેલી જિલ્લાના ધારી શહેરના ગણેશ સોસાયટી નજીક ખાડિયા વિસ્તારમાં છેલ્લા ત્રણ દિવસથી દીપડાની અવરજવર જોવા મળતા સ્થાનિકોમાં ચિંતા ફેલાઈ હતી. રહેણાંક વિસ્તારની આસપાસ દીપડો દેખાતા લોકો દ્વારા તાત્કાલિક વન વિભાગને જાણ કરવામાં આવી હતી.

માહિતી મળ્યા બાદ વન વિભાગની ટીમે ઘટનાસ્થળની સ્થિતિનો તાગ મેળવી દીપડાને સુરક્ષિત રીતે પકડવા માટે પાંજરું ગોઠવ્યું હતું. ત્રણ દિવસથી દીપડાની હિલચાલને કારણે સ્થાનિકો સતર્ક બન્યા હતા અને ખાસ કરીને રાત્રિના સમયે ભયનો માહોલ જોવા મળ્યો હતો.

વન વિભાગની કવાયત રંગ લાવી અને સાંજના સમયે ગોઠવવામાં આવેલા પાંજરામાં દીપડો સફળતાપૂર્વક સપડાઈ ગયો હતો. દીપડો પાંજરે પુરાતા વન વિભાગની ટીમે રાહત અનુભવી હતી, તેમજ ગણેશ સોસાયટી અને ખાડિયા વિસ્તારના સ્થાનિકોએ પણ ભયમુક્ત થતાં હાશકારો અનુભવ્યો હતો.

વન વિભાગ દ્વારા હવે આ દીપડાને સુરક્ષિત સ્થળે ખસેડવા અંગેની જરૂરી કાર્યવાહી હાથ ધરવામાં આવશે. આ ઘટનાથી સ્થાનિક વિસ્તારમાં છેલ્લા કેટલાક દિવસથી રહેલો ભય ઓછો થયો છે.