પોરબંદરના બરડા ડુંગર વિસ્તારમાં પોલીસનું મેગા ઓપરેશન: ધમધમતી દેશી દારૂની ભઠ્ઠી ઝડપાઈ

ભાવનગર લઠ્ઠાકાંડની ગંભીર ઘટના બાદ રાજ્યભરમાં પોલીસ તંત્ર સતર્ક બન્યું છે. આ કડીમાં પોરબંદર પોલીસ પણ એક્શન મોડમાં આવી ગઈ છે. પોરબંદર LCB (લોકલ ક્રાઈમ બ્રાન્ચ) ની ટીમે બરડા ડુંગર વિસ્તારમાં અચાનક દરોડા પાડીને ધમધમતી દેશી દારૂની ભઠ્ઠી ઝડપી પાડી છે.

પોલીસની આ કાર્યવાહી દરમિયાન સ્થળ પરથી દારૂ બનાવવા માટે ઉપયોગમાં લેવાતી તમામ સામગ્રી અને સાધનો મળી આવ્યા હતા. પોલીસે કાયદાકીય પ્રક્રિયા હાથ ધરીને ઘટનાસ્થળે જ દારૂ બનાવવાની તમામ સામગ્રીનો નાશ કર્યો હતો.

પોરબંદર પોલીસ દ્વારા કરવામાં આવેલી આ આકસ્મિક કાર્યવાહીથી બૂટલેગરોમાં ફફડાટ ફેલાઈ ગયો છે. પોલીસ દ્વારા આ વિસ્તારમાં સતત દેખરેખ રાખવામાં આવી રહી છે જેથી ગેરકાયદેસર પ્રવૃત્તિઓ પર અંકુશ લાવી શકાય.