સિવિલ જજ બનવા માટેના નિયમોમાં ફેરફાર: હવે માત્ર એક વર્ષની વકીલાત બાદ આપી શકાશે પરીક્ષા

સુપ્રીમ કોર્ટે ન્યાયિક સેવામાં પ્રવેશ મેળવવા માંગતા ઉમેદવારો માટે મહત્વનો નિર્ણય લીધો છે. કોર્ટે ન્યાયિક સેવામાં પ્રવેશ માટે જરૂરી કાયદાકીય પ્રેક્ટિસના નિયમોમાં સુધારો કરવાની મંજૂરી આપી છે. આ નિર્ણય બાદ હવે સિવિલ જજ બનવા માટે ઉમેદવારે ત્રણ વર્ષને બદલે માત્ર એક વર્ષની વકીલાતનો અનુભવ ધરાવવો પૂરતો રહેશે.

અગાઉ ન્યાયિક સેવામાં જોડાવા માટે ત્રણ વર્ષની ફરજિયાત પ્રેક્ટિસનો નિયમ અમલમાં હતો, જેને લઈને સુપ્રીમ કોર્ટમાં પુનઃર્વિચાર અરજી કરવામાં આવી હતી. જોકે, કોર્ટે આ પ્રેક્ટિસની જરૂરિયાતને સંપૂર્ણપણે નાબૂદ કરવાનો ઇનકાર કર્યો છે, પરંતુ ઉમેદવારોની સુવિધાને ધ્યાનમાં રાખીને સમયગાળો ઘટાડીને એક વર્ષ કરી દીધો છે.

આ સુધારાના અમલીકરણ સાથે, હવે કાયદાના સ્નાતકો એક વર્ષની પ્રેક્ટિસ પૂર્ણ કર્યા બાદ સિવિલ જજની પરીક્ષામાં બેસવા માટે પાત્ર ગણાશે. સુપ્રીમ કોર્ટનો આ નિર્ણય ન્યાયિક સેવામાં જોડાવા ઈચ્છતા યુવા વકીલો માટે મોટી રાહત સમાન માનવામાં આવે છે.