વડોદરા: વિશ્વામિત્રી નદીમાંથી નીકળીને મંગલ પાંડે રોડ પર આવ્યો મહાકાય મગર

વડોદરા શહેરના મંગલ પાંડે રોડ પર આજે એક ચોંકાવનારી ઘટના સામે આવી હતી. વિશ્વામિત્રી નદીના ઘાટના પાંચ પગથિયાં ચડીને એક મહાકાય મગર અચાનક મુખ્ય માર્ગ પર આવી પહોંચ્યો હતો. રસ્તા પરથી પસાર થતા વાહનચાલકો અને સ્થાનિક લોકો આ દ્રશ્ય જોઈને સ્તબ્ધ થઈ ગયા હતા.

મગરને રસ્તા પર જોઈને ત્યાં લોકોના ટોળાં ઉમટી પડ્યા હતા. ઘણા લોકોએ આ અસામાન્ય ઘટનાને પોતાના મોબાઈલ ફોનમાં કેદ કરી હતી અને તેનો વિડિયો સોશિયલ મીડિયા પર વાયરલ કર્યો હતો. મગરના આગમનને પગલે વાહન વ્યવહારમાં પણ થોડા સમય માટે અવરોધ ઊભો થયો હતો.

ઉલ્લેખનીય છે કે વિશ્વામિત્રી નદીમાં ૪૦૦થી વધુ નાના-મોટા મગરો વસવાટ કરે છે. નદીના આ મગરો અવારનવાર ચોમાસા દરમિયાન કે અન્ય સમયે શહેરી વિસ્તારોમાં આવી પહોંચતા હોય છે, જેને કારણે સ્થાનિક તંત્ર અને નાગરિકો માટે આ એક ચિંતાનો વિષય બન્યો છે.