સુરતના અડાજણમાં ડ્રગ્સ સાથે બે શખ્સો ઝડપાયા, ૧.૧૨ લાખનો મુદ્દામાલ જપ્ત

સુરતના અડાજણ વિસ્તારમાં આવેલી ભુલાભાઈ પાર્ક સોસાયટી પાસે પોલીસે ડ્રગ્સના વેચાણના પ્રયાસમાં બે શખ્સોને ઝડપી પાડ્યા છે. આ કાર્યવાહી દરમિયાન પોલીસે આરોપીઓ પાસેથી ૫.૮૦૦ ગ્રામ મેફેડ્રોન ડ્રગ્સ કબજે કર્યું છે.

પોલીસે સ્થળ પરથી ડ્રગ્સ ઉપરાંત બે મોબાઈલ ફોન અને એક રિક્ષા પણ જપ્ત કરી છે. કબજે કરાયેલા કુલ મુદ્દામાલની કિંમત ૧.૧૨ લાખ રૂપિયા હોવાનું સામે આવ્યું છે. પકડાયેલા બંને આરોપીઓ સામે એનડીપીએસ (NDPS) એક્ટ હેઠળ ગુનો નોંધી કાયદેસરની કાર્યવાહી હાથ ધરવામાં આવી છે.

આ પ્રકરણમાં અંજુ પટેલ નામના વ્યક્તિને પોલીસે વોન્ટેડ જાહેર કર્યા છે. હાલમાં આ ડ્રગ્સ નેટવર્ક ક્યાંથી ચાલતું હતું અને તેની સાથે અન્ય કોણ સંકળાયેલું છે, તે અંગે પોલીસ દ્વારા વધુ તપાસ કરવામાં આવી રહી છે.