ਗੁਰਜੀਤ ਤੂਤ ਦੇ ਭੋਗ ਸਮਾਗਮ ਮੌਕੇ ਗੁਰਪ੍ਰੀਤ ਸੇਖੋ ਦਾ ਵੱਡਾ ਐਲਾਨ, ਧੀ ਦੇ ਵਿਆਹ ਦਾ ਸਾਰਾ ਖਰਚਾ ਚੁੱਕਣ ਦਾ ਲਿਆ ਅਹਿਦ

ਗੁਰਜੀਤ ਤੂਤ ਦੇ ਭੋਗ ਸਮਾਗਮ ਦੌਰਾਨ ਗੁਰਪ੍ਰੀਤ ਸੇਖੋ ਨੇ ਭਾਵੁਕ ਹੁੰਦਿਆਂ ਪਰਿਵਾਰ ਲਈ ਇੱਕ ਵੱਡਾ ਐਲਾਨ ਕੀਤਾ ਹੈ। ਸੇਖੋ ਨੇ ਕਿਹਾ ਕਿ ਉਨ੍ਹਾਂ ਦੀਆਂ ਆਪਣੀਆਂ ਚਾਰ ਧੀਆਂ ਹਨ ਅਤੇ ਹੁਣ ਗੁਰਜੀਤ ਦੀ ਧੀ ਉਨ੍ਹਾਂ ਦੀ ਪੰਜਵੀਂ ਧੀ ਹੈ। ਉਨ੍ਹਾਂ ਨੇ ਪਰਿਵਾਰ ਨੂੰ ਭਰੋਸਾ ਦਿਵਾਇਆ ਕਿ ਉਹ ਹਰ ਦੁੱਖ-ਸੁੱਖ ਵਿੱਚ ਉਨ੍ਹਾਂ ਦੇ ਨਾਲ ਖੜ੍ਹੇ ਹਨ।

ਗੁਰਪ੍ਰੀਤ ਸੇਖੋ ਨੇ ਐਲਾਨ ਕੀਤਾ ਕਿ ਜਦੋਂ ਗੁਰਜੀਤ ਦੀ ਧੀ ਦਾ ਵਿਆਹ ਹੋਵੇਗਾ, ਤਾਂ ਉਸਦਾ ਸਾਰਾ ਖਰਚਾ ਉਹ ਖੁਦ ਚੁੱਕਣਗੇ। ਉਨ੍ਹਾਂ ਕਿਹਾ ਕਿ ਵਿਆਹ 'ਤੇ ਚਾਹੇ 50 ਲੱਖ ਰੁਪਏ ਖਰਚ ਹੋਣ ਜਾਂ 1 ਕਰੋੜ ਰੁਪਏ, ਉਹ ਪੂਰੀ ਜ਼ਿੰਮੇਵਾਰੀ ਨਿਭਾਉਣਗੇ।

ਇਸ ਮੌਕੇ ਗੁਰਪ੍ਰੀਤ ਸੇਖੋ ਨੇ ਪਰਿਵਾਰ ਨੂੰ ਤੁਰੰਤ ਮਦਦ ਵਜੋਂ ਇੱਕ ਲੱਖ ਰੁਪਏ ਦੀ ਰਾਸ਼ੀ ਵੀ ਭੇਟ ਕੀਤੀ। ਸੇਖੋ ਵੱਲੋਂ ਦਿਖਾਈ ਗਈ ਇਸ ਹਮਦਰਦੀ ਅਤੇ ਸਮਾਜਿਕ ਜ਼ਿੰਮੇਵਾਰੀ ਦੀ ਚਾਰੇ ਪਾਸੇ ਸ਼ਲਾਘਾ ਕੀਤੀ ਜਾ ਰਹੀ ਹੈ।